Gələn mövsüm İngiltərə çempionatında çıxış edəcək sonuncu kollektivin adına aydınlıq gəlib.

"Football-plus.az" xəbər verir ki, çempionşipdə mövsümün yekunlarına əsasən ilk iki pilləni tutan ''Fulhem'' və ''Bornmut'' premyer-liqaya birbaşa vəsiqə qazanmışdısa, ''Haddersfild'', ''Nottingem Forest'', ''Şeffild Yunayted'' və ''Luton'' pley-off oynamalı olmuşdu. Dünən ''Uembli''də keçirilən pley-offun finalında ''Nottingem Forest'' ''Haddersfild''i 1:0 hesabı ilə məğlub edərək elitaya vəsiqə qazanıb. Bununla da komandanın 23 illik həsrəti başa çatıb.

Nottingem təmsilçisi sonuncu dəfə 1998/99 mövsümündə premyer-liqada oynayıb. Komandanın 7-ci turdan sonra 1 xalla turnir cədvəlinin sonuncu (!) pilləsində qərarlaşdığını nəzərə alsaq, bunun inanılmaz bir uğur olduğunu görərik. İstefaya göndərilən Kris Hyutonun yerinə Stiv Kuperin baş məşqçi postuna gətirilməsindən sonra nəticələr yaxşılaşmağa başladı. 7-ci turdan sonrakı dönəmi götürsək, ''Nottingem Forest'' ən çox xal toplayan komanda oldu.

Onu da bildirək ki, bu komanda həm də Çempionlar Kubokunun ikiqat (1979, 1980) qalibidi və bu göstəriciyə görə İngiltərədə yalnız ''Liverpul'' (6) ilə ''Mançester Yunayted''dən (3) geri qalır.