Misli premyer-liqasının 14-cü turunun açılış matçı Masazırda keçirildi.

"Sabah"ın "Qarabağ"ı qəbul etdiyi görüş gərgin və maraqlı mübarizə şəraitində keçdi. 2 penaltinin verildiyi, 3 qolun vurulduğu matçda ağdamlılar qələbə qazandı. Sonradan bu qələbənin Qurban Qurbanovun komandasını lider edəcəyi aydın oldu.

Şənbə günü ilk oyun Bakıda keçirildi. "ASCO Arena"nın işıqlandırma sistemindəki problemə görə "Səbail" - "Kəpəz" matçı saat 14.00-a keçirilmişdi. Şahin Diniyev "Qarabağ"a məğlubiyyəti unutdurmaq üçün Gəncə təmsilçisi üzərində qələbə qazanmaq istəyirdi. Lakin Adil Şükürov da debüt oyununda uduzmaq istəmirdi. Qarşılıqlı hücumlar şəraitində keçən oyunda hesab açılmadı.

Günün ikinci matçında “Qəbələ” “Turan Tovuz”u qəbul edirdi. "Qırmızı-qaralar"ın qələbə qazanacağını güman etmək olardı. Lakin hesabın belə biabırçı olması gözlənilmirdi. Elmar Baxşıyevin komandası "boz qurd"u meydana çıxmağa peşman etdi. Sanki "Qəbələ" çempionatda uduzduğu bütün rəqiblərin acığını "Turan Tovuz"dan çıxdı. Qarşılaşma 4:0 hesabı ilə "qırmızı-qaralar"ın xeyrinə başa çatdı. Bu qələbə sayəsində Elmar Baxşıyevin komandası turnir cədvəlinin sonuncu pilləsindən canını qurtardı.

Bazar günü də iki oyuna şahidlik etdik. İlk oyunda "Neftçi" "Araz-Naxçıvan"ı qəbul etdi. Milli fasilədə "Zenit"i məğlub edən flaqmanın bu görüşdə rahat qələbə qazanacağı gözlənilirdi. Əslində hər şey "ağ-qaralar" üçün yaxşı başlamışdı. Matiasın yeganə qolu ilə Bakı klubu öndə idi. Lakin uzatma dəqiqələrində Orxan Əliyev Muxtar Respublika təmsilçisinə 1 xal qazandıran qolu vurdu. Beləliklə, "Neftçi" ikinci dövrədə də "Araz-Naxçıvan"ı məğlub edə bilmədi.

Turun son oyununda “Sumqayıt” “Zirə”ni qəbul etdi. Hər iki komanda meydana qələbə üçün çıxmışdı. "Sumqayıt" 3-cü pillədə təsadüfən qərarlaşmadığını isbat etmək istəyirdi. "Qartallar" isə liderliyi davam etdirmək arzusundaydı. Lakin hər iki tərəfin cəhdlərinə baxmayaraq, hesab açılmadı. Bu nəticə ilə "Zirə" turnir cədvəlindəki mövqeyini "Qarabağ"a təhvil verdi.

Misli premyer-liqası
2-ci dövrə, 14-cü tur
24 noyabr
Sabah - Qarabağ 1:2
25 noyabr
Səbail - Kəpəz 0:0
Qəbələ - Turan Tovuz 4:0
26 noyabr
Neftçi - Araz-Naxçıvan 1:1
Sumqayıt - Zirə 0:0
1. Qarabağ 14 9 2 3 33-13 29
2. Zirə 14 8 4 2 13-7 28
3. Sumqayıt 14 6 4 4 14-14 22
4. Səbail 14 6 4 4 22-21 22
5. Araz-Naxçıvan 14 6 3 5 16-15 21
6. Neftçi 14 5 4 5 15-13 19
7. Sabah 14 4 4 6 19-19 16
8. Turan Tovuz 14 4 3 7 21-22 15
9. Qəbələ 14 3 2 9 11-23 11
10. Kəpəz 14 2 4 8 7-24 10
Bombardirlər: Olavio Juninyo (Qarabağ) – 10, Aleksandr Ramalinqom (Səbail) - 6.
Növbəti turun oyunları
2 dekabr, 16.00. Araz-Naxçıvan - Səbail
2 dekabr, 18.30. Turan Tovuz - Sumqayıt
3 dekabr, 15.00. Kəpəz - Sabah
3 dekabr, 17.00. Neftçi - Zirə
4 dekabr, 19.30. Qarabağ - Qəbələ

İLKİN SULTANLI