İlk turda uduzan komandalara bu matçda qələbə çox vacib idi.

Elmar Baxşıyev darmadağın olduqları “Sabah”la oyundan fərqli heyətdə dəyişiklik etmişdi. Çalışdırıcı 1-ci turdakı görüşdə start “11-lik”də yer alan Emil Səfərovla Bilel Auaşeriyanı ehtiyatda saxlayıb, onların əvəzinə Ülvi İsgəndərovla Gilad Avramova şans vermişdi. İsrailli Avramov premyer-liqada məhz bu qarşılaşmada debüt etdi. İlk dəqiqələrdən “qırmızı-qaralar” topa sahibolmada üstün idi. Həmçinin bölgə təmsilçisinin futbolçularında aqresivlik hiss olunurdu. Bəzi epizodlarda rəqibin oyunçularına qarşı çox sərt mübarizə aparırdılar. 17-ci dəqiqədə “qırmızı-qaralar”ın kapitanı Urfan Abbasovun yanlış ötürməsi komandasına baha başa gəldi. Nəticədə topu ələ keçirən Kuzmanoviç uzun reyd edəndən sonra Azzauiyə elə gözəl ötürmə verdi ki, belçikalı bu şansı qaçırsaydı, həvəskarların sırasına qoşulması yaxşı olardı. Qoldan sonra “Qəbələ” hücum qurmağa çalışsa da, “Araz-Naxçıvan”ın müdafiəçiləri rəqibin forvardlarına əl-qol açmağa imkan vermirdi. Əvəzində 27-ci dəqiqədə Kuzmamoviç fərqi artıra bilərdi.

2-ci hissə başlayan kimi Emil Səfərov uzaqdan zərbə ilə naxçıvanlıların qapıçısını yoxladı. 52-ci dəqiqədə Əllaş da təxminən 25 metrdən qapıya düşmək istədi, zərbəsi təhlükəli alınsa da, azca aralı keçdi. 58-ci dəqiqədə sol cinahla irəliləyən Kuzmanoviç daha bir komanda yoldaşının fərqlənməsi üçün əlindən gələni etdi. Amma onun qapı önünə ötürməsindən sonra Orxan Əliyevin baş zərbəsi dirəkdən döndü. 60-cı dəqiqədə qonaqlar hesabı bərabərləşdirməyə çox yaxın oldu, ancaq qolkiper Kristian Avram iki cəhddə topu tura bildi. Sona yaxın Azər Bağırovun əvəzetməsi işə yaradı. Belə ki, konqolu Maşike meydana çıxandan 11 dəqiqə sonra komandasının 2-ci qoluna imza atdı. Oyunun son yaddaqalan epizodu 90+4-cü dəqiqədə baş verdi.Qonaqlardan Ülvi İsgəndərov topsuz vəziyyətdə Zamiq Əliyevin başına zərbə vurduğu üçün birbaşa qırmızı vərəqə ilə meydandan qovuldu. Beləliklə, “Qəbələ” yeni mövsümdə ardıcıl 2-ci, avrokubokları da nəzərə alsaq, 4-cü qarşılaşmadan da məğlub ayrıldı. Elitanın debütantı “Araz-Naxçıvan” isə yeni “futbol ili”ndə ilk qələbəsini qazandı.

Gözdən qaçmadı
* Stadionda azarkeşlərin sayı az idi.
* 44-cü dəqiqədə “Şəhidlər ölməz, vətən bölünməz” şüarları səsləndi.
* Oyunu izləyənlər arasında tanınmış meyxanaçı Vüqar Maştağalı və hazırda “Sumqayıt”ın akademiyasında işləyən veteran futbolçu Vaiqf Cavadov da var idi.

CAVİD ƏLİYEV