"Neftçi"nin "Sumqayıt"la duelini hər kəs səbirsizliklə gözləyirdi. Çünki "ağ-qaralar" matçdan öncə sosial şəbəkə hesabında yaydığı video ilə rəqibini qızışdırmışdı. Bununla yanaşı, baş məşqçi Adrian Mutunun özünü sübut etməsi üçün növbəti fürsət ayağına gəlmişdi. Qələbə klub üzərindəki təzyiqi yumşaltmaqla yanaşı, qarşıdakı oyunlar üçün motivasiya mənbəyi olacaqdı. Qonaqlar isə mövsümün yüksəlişdə olan komandasıydı. Samir Abasov ötən tur "Araz-Naxçıvan"ı yenməklə daxili ab-havanı yaxşılaşdırmışdı. Həm də "Neftçi"nin yuxarıda xatırlatdığımız atmacasına (“işıqları söndürün, seks başlayır”) layiqincə cavab vermək "gənclər şəhəri" təmsilçisinin başlıca amalına çevrilmişdi.

Oyunun əvvəli qarşılıqlı hücumlar fonunda keçdi. Həmin anlar “Sumqayıt”dan Kehatın, “Neftçi”dən isə Boqomolski ilə Valdesin qapını dəqiq nişan ala bilməməsiylə yadda qaldı. Oyunda ilk tutarlı zərbənin müəllifi Rövlan oldu. Lakin Aqilin sayıqlığı hesabın açılmasının qarşını aldı. Bu, ev sahiblərini ruhlandırdı ki, nəticədə ilk qol qeydə alındı. Boqomolski – Mirzov duetinin təşkil etdiyi hücumdan Caber faydalandı və 34-cü dəqiqədə komandasını önə keçirdi. Beləliklə, ilk yarı “ağ-qaralar”ın üstünlüyü ilə başa çatdı. İkinci yarıya “Sumqayıt” daha yaxşı başladı. Ancaq Mossi və Səbuhi sırayla rəqib qapıçını narahat etsə də, məqsədə nail ola bilmədi. Bundan sonra sanki “Sumqayıt”a yeni ruh gəldi. Abasovun komandasının buna qədər qorxaq oynadığını demirik. Daha çox qeyri-dəqiqliklə yadda qalan Mossi bu dəfə dəqiq ötürməylə topu Murataya çatdırdı. Yaponiyalı yarımmüafiəçi Höccətin buraxdığı boşluqdan istifadə edib hesabı bərabərləşdirdi. İndi çoxu “Neftçi”nin irəli atılacağını gözləsə də, belə olmadı. Bakılılar, sadəcə, iki epizodda fərqlənə bilərdi ki, fürsəti puç etdilər. Lebonun uzaqdan, Eminin qapı önündən zərbəsi “çərçivə”yə düşmədi. Əlbəttə, bu, “kimyaçılar”ı cəsarətləndirməyə bilməzdi. Vüqar azarkeşlərin “kapitan, kapitan!” şüarları altında xeyli irəliləyib Kehata ötürmə verdi. İsrailli yarımüdafiəçi Azərlə mübarizədən qalib ayrıldı və baş zərbəsiylə “Sumqayıt”ı hesabda önə keçirdi. Bundan sonra daha çox “Neftçi”nin hücumlarını izlədik. Matias bir, Şinyaşiki iki dəfə fərqlənməyə yaxın idi. Lakin qonaqların müdafiə xətti və qapıçısı rəqibə şans tanımırdı. Mehdi Rəhmanın zərbəsini də ustalıqla dəf etdikdən sonra “Sumqayıt” növbəti qol epizodunun müəllifi oldu. Bu dəfə yenicə meydana çıxmış Velinovski bəxtini sınasa da, qapı tiri onun sevinməsinə imkan vermədi. Ancaq məyus olmağa dəyməzdi. Çünki Rauf Cabbarov bir neçə dəqiqə sonra final fitini səsləndirərək “kimyaçılar”ın qələbəsini rəsmiləşdirdi.

Gözdən qaçmadı

* Oyun bitəndən sonra emosiyalarını cilovlaya bilməyən Samir Abasov meydana atıldı və qələbəni qeyd etməyə başladı. Baş məşqçinin hərəkətlərindən xoşu gəlməyən Matias ona qarşı çıxdı. Daha sonra məsələyə Murad Xaçayev və Alin-Nikol Çita da qarışdı. Baş hakim aranı sakitləşdirmək üçün futbolçuları və “Neftçi”nin məşqçisini sarı, Abasovu qırmızı vərəqəylə cəzalandırdı. Buna mütəxəssisin oyunun gedişində “sarı” alması da səbəb oldu.
* “Sumqayıt” qələbəni azarkeşləriylə birgə qeyd etdi. Onlar “Neftçi”, tekst qurtardı”, - deyə qışqırırdı.

KƏNAN BAHADIR