Bu gün ölkəmizin əsas komandası AÇ-2024-ün seçmə mərhələsinin 5-ci turu çərçivəsində Belçikanı qəbul edəcək. 

"Dalğa Arena"da keçiriləcək qarşılaşma Serbiyadan olan hakimlər briqadasına həvalə olunub. FİFA referisi Nenad Minakoviçə yan xətt hakimləri Slobodan Pavloviç və Nikola Boroviç kömək edəcək. Dördüncü hakim funksiyasını isə Milan Mitiç yerinə yetirəcək. Beləliklə, "Football-plus.az"ın ənənəvi hakim təqdimatına keçid alaq.

Nenad Minakoviç... O, 2021-ci ildən beynəlxalq görüşlərə təyinat alır. Referi 2021-ci ildə 21 yaşadək futbolçular arasında Litva və Şimali İrlandiya komandaları (1:1) arasında keçirilmiş Avropa çempionatının seçmə mərhələ matçında beynəlxalq dərəcəli hakim kimi debütünü rəsmiləşdirib. Həmin vaxta qədər isə Serbiya çempionatında püxtələşib. Ədalət təmsilçisi ölkəsində ümumilikdə 143 matçda meydana çıxıb. Hakim bu qarşılaşmalarda 643 sarı, 24 qırmızı vərəqə göstərib. Minakoviçin qalmaqallı biri olduğunu demək doğru olmaz. Düzdü, haqqında geniş məlumat tapmaq asan olmadı. Görünür, "fit sahibi" ya gündəmə gəlməyi sevmir, ya da başını aşağı salıb işiylə məşğul olduğundan diqqətləri üzərinə çəkməyib. 

Maraqlıdı ki,  33 yaşlı ədalət təmsilçisi ilk dəfə Azərbaycan komandasının matçına təyinat alıb. O, təxminən 2 illik referilik karyerası boyunca qənaətbəxş səviyyə ilə yadda qalıb. Minakoviç Konfrans Liqasının, UEFA Gənclər liqasının matçlarını, 4 beynəlxalq yoldaşlıq oyununu, U-21-lər və U-17-lər arasında Avropa çempionatının seçmə oyunlarını idarə edib. Xüsusilə 2022/23 mövsümündə Konfrans Liqasının 3-cü təsnifat mərhələsində "Poqon" (Polşa) və "Bröndbu" (Danimarka) komandaları arasında keçirilən ilk görüşü (1:1) və cari "futbol ili"ndə "Neman"la (Belarus) "Vaduts" (Lixtenşteyn) arasında gerçəkləşən Konfrans Liqasının 1-ci təsnifat mərhələsinin cavab matçında (1:1) iş başında olması maraqla qarşılanıb. Xatırladaq ki, serbiyalı hakim həmçinin bu il "Fənərbaxça"nın Konfrans Liqasında qələbə qazandığı qarşılaşmalardan birində meydana çıxıb. O, İstanbul nəhənginin evdə Moldova "Zimbru"sunu 5 cavabsız qolla üstələdiyi oyunda ədaləti qoruyub. Ümumiyyətlə, Minakoviç 163 matçda iştirak edib. O, bu qarşılaşmalarda 722 sarı, 30 qırmızı vərəqə göstərib. 

Azərbaycan - Belçika matçı onun əsas millilər səviyyəsində ilk Avropa çempionatı sınağıdı. Ən azı karyerasının gələcəyi baxımından doğru addımlar atacağına inanmaq istəyirik...

KƏNAN BAHADIR