Vasif İsmayılov bu dəfə “Çinar-Zəngilan”dan ayrıldı
Bir neçə gün öncə Vasif İsmayılov "Füzuli"yə qayıdaraq icraçı direktor vəzifəsinə sahibləndi.
Təxminən bir ay öncə 2-ci liqa təmsilçisindən istefa verən Vasif bəy Region Liqasında mübarizə aparan "Çinar-Zəngilan"da idman direktoru vəzifəsinə irəli çəkilmişdi.
Hətta İsmayılov "Füzuli"dəki köhnə-yeni vəzifəsinə qayıdandan sonra da Zəngilan təmsilçisinin baş məşqçisi Anar Dünyamalıyev onun hər iki komandada çalışacağını vurğulamışdı. Bir insan iki klubda necə çalışa bilər? Bu mümkündümü? Məsələni dəqiqləşdirmək üçün PFL rəsmisi Elgiz Abbasovla əlaqə saxladıq:
"Vasif İsmayılovun "Füzuli"dən öz razılığıyla getməsindən, ardından "Çinar-Zəngilan"da vəzifəyə irəli çəkilməsindən, sonda yenidən 2-ci liqa təmsilçisinə qayıtmasından xəbərdarıq. Eləcə də Vasif bəyin həm "Füzuli"də icraçı direktor, həm də "Çinar-Zəngilan"da idman direktoru vəzifəsini icra edəcəyini oxumuşuq. Ümumiyyətlə, bir şəxs iki ayrı-ayrı klubda vəzifə daşıya bilməz. Biz PFL olaraq, bunu dəstəkləmirik".
Dünən isə Vasif İsmayılov “feysbuk” sosial şəbəkəsində "Çinar-Zəngilan"dakı vəzifəsindən istefa verdiyi, ancaq "Füzuli"də çalışacağı ilə bağlı paylaşım etdi.
ABDULLA İSMAYILOĞLU
Digər xəbərlər
