“Füzuli” üçün can qoymuşdu, indi də Zəngilan üçün çalışacaq
Ötən mövsüm Region Liqasının finalında oynayan "Çinar-Zəngilan"ın yeni mövsümdə də bu turnirdə iştirak edəcəyini vurğulamışdıq.
"Football-plus.az" xəbər verir ki, komanda qarşısına Region Liqasının çempion olmaq hədəfi qoyub. Zəngilan təmsilçisində yeni təyinat da gerçəkləşib.
Hazırda 2-ci liqada mübarizə aparan "Füzuli"nin sabiq idman direktoru Vasif İsmayılov bundan sonra "Çinar-Zəngilan"da həmin vəzifəni daşıyacaq. Bu təyinatla bağlı komandanın baş məşqçisi Anar Dünyamalıyevdəm reaksiya aldıq:
"Bildiyiniz kimi, bu mövsüm qarşımıza çempion olmaq hədəfi qoyulub. Ona görə də peşəkarlaşmaq yolunda addım ataraq Vasif İsmayılovu idman direktoru postuna gətirdik. Vasif bəy yetərincə təcrübəli mütəxəssisdi. Onun "Füzuli"dəki xidmətləri göz qabağındadı. Bu gün Fuzuli təmsilçisinin 2-ci liqada çıxış etməsinin səbəbkarı Vasif bəydi. Odu ki, Vasif bəyin bizdə də faydalı idman direktoru olacağına inanıram".
Vasif İsmayılovin da fikirlərini öyrəndik:
"Bildiyiniz kimi, özüm Füzulidən olsam da, həmişə qeyd etmişəm ki, bütün Qarabağ komandaları mənim üçün əzizdi. "Füzuli" başda olmaqla bütün işğaldan azad olunan rayonlarımızın təmsilçiləri mənim üçün dəyərlidi. Hətta ötən mövsüm 1/4 finala gedən yolda məğlub olub kənarda qalanda "Çinar-Zəngilan"a azarkeşlik etdik. Zəngilan təmsilçisinə təyinatıma gəlincə, komandanın baş məşqçisi Anar Dunyamalıyevdən təklif gəldi, mən də müsbət qarşıladım. Qarşımıza çempion olaraq 2-ci liqaya yüksəlmək hədəfi qoymuşuq. Bu yolda əlimizdən gələn hər şeyi edəcəyik".
ABDULLA İSMAYILOĞLU
