Turun ən maraqla gözlənilən oyunu bazar günü keçirildi. Hər iki komanda qol vurmağı sevir. Həm də “Səbail”in ilk dövrədə “Qarabağ”I məğlub etməsi bu qarşılaşmaya marağı daha da atırmışdı. Lakin heyətdə zədəlilərin olması Şahin Diniyevin planlarını korlamışdı.

"Football-plus.az" xəbər verir ki, oyuna istəkli başlayan ağdamlılar cinahlarda “dənizçilər”i sıxışdırmağı bacarırdı. Bu da 8-ci dəqiqədə işə yaradı. Toral Leandronun ötürməsindən sonra bir rəqibini də geridə qoyaraq hesabı açdı. “Səbail”in meydana nominal hücumçusuz çıxdığı açıq-aşkar hiss olunurdu. Düzdü, Pedro tez-tez “Qarabağ”ın müdafiəçilərini narahat edirdi. Lakin pleymeyker son zərbələrdə dəqiq ola bilmirdi. Matçda növbəti qol 43-cü dəqiqədə vuruldu. “Köhlən atlar” əla kombinasiyanı qola çevirdi. Yenə məhsuldar ötürməni Leandro verdi. Qolu isə Benzya vurdu.

Diniyev fasilədə iki futbolçunu əvəzlədi. Süleymanla Bahadurun əvəzinə Yadin və Amil meydana çıxdı. Təcrübəli mütəxəssis hücumdakı boşluğu aradan qaldırmaq istəyirdi. Lakin 2-ci hissəyə də ağdamlılar daha fəal başladı. Zubir – Juninyo - Leandro “üçlüy”ü “dənizçilər”ə tez-tez problem yaradırdı. Növbəti qolu da meydan sahibləri vurdu. 54-cü dəqiqədə Leandronun ötürməsini Juninyo dəqiq zərbə ilə tamamladı.

“Səbail” isə təslim olmaq istəmirdi. Diniyevin komandası böyükhesablı məğlubiyyəti də gözə alaraq hücum futbolu sərgiləyirdi. 77-ci dəqiqədə Pedro qollardan birinin əvəzini çıxdı. Bundan sonra təhlükəli hücumları ancaq meydan sahibləri qurdu. Keyta, Nəriman, Cica qola yaxın olsalar da, Səlahət hesabın dəyişməsinə imkan vermədi. Beləliklə, oyun 3:1 hesabı ilə “Qarabağ”ın xeyrinə başa çatdı. “Köhlən atlar” “Səbail”dən ilk dövrədəki məğlubiyyətin acığını çıxa bildi.

Gözdən qaçmadı
* Oyundan əvvəl Ağdam təmsilçisinin sosial şəbəkə səhifəsində keçirilən yarışın qalibləri mükafatlandırıldı. Tanınmış idmançı Zabit Səmədov onlara hədiyyə təqdim etdi.
* Protokoldan oyunu izləyən azarkeşlərin sayı 861 kimi göstərilib. Lakin bu rəqəm heç 500-ü keçməzdi.

İLKİN SULTANLI