Çoxları düşünürdü ki, yenilənmiş “Neftçi” bu dəfə “Qarabağ”a qarşı nəsə edə biləcək. Çünki “ağ-qaralar” bütövlüklə dəyişmişdi. Lakin oyun başlayan kimi “köhlən atlar” gücünü göstərdi. Artıq 2-ci dəqiqədə Leandro hesabı aça bilərdi. Lakin afrikalının zərbəsi dəqiq olmadı. İlk hissədə hiss olundu ki, Mutu meydana yanlış “11-lik” buraxıb. Komanda rəqibə qarşı normal oyun sərgiləyə bilmirdi. Sadəcə, Boqomolski sağa-sola qaçmaqla kifayətlənirdi. Ağdamlılar isə təzyiqlə “Neftçi” müdafiəsini alt-üst edirdi.

Fasilədə Mutu birdən-birə üç dəyişiklik etdi. Olanare, Valdes və Koffi meydana çıxdı. Lakin bu dəyişikliklər də işə yaramadı. Fasilə bitən kimi “Qarabağ” ardıcıl 9 ötürməni qolla tamamladı. Qoldan sonra “ağ-qaralar” özünə gəlməyə çalışırdı. Lakin heç nə alınmırdı. “Qarabağ” isə ələ düşən şansları sağa-sola xərcləyirdi. 75-ci dəqiqədən sonra “ağ-qaralar” basqılı oynamağa başladı. Hamı flaqmanın hesabı bərabərləşdirəcəyini düşündüyü anda ağdamlılar ikinci qolu vurdu. Cica zədədən qayıdışını qolla qeyd etdi. Beləliklə, oyun ağdamlıların qələbəsi ilə başa çatdı. Qurbanovun komandası növbəti dəfə gücünü əzəli rəqibə göstərdi. Mutu isə nəyisə göstərməkdən daha çox danışır…

Gözdən qaçmadı
* İsinmə hərəkətləri zamanı “Neftçi”nin qolkiperi Aqil Məmmədovla “Qarabağ” azarkeşləri arasında söz atışması oldu. Təcrübəli qapıçı fanatlara “nə olub? Hələ oyun başlamayıb” dedi.
* Oyundan əvvəl “Neftçi”nin baş icraçı direktoru Fərrux Mahmudov kapitan Emin Mahmudova flaqmanın heyətində 200 oyun keçirdiyi üçün plaket hədiyyə etdi.
* Görüş başlamamış SOCAR-ın vitse-prezidenti Xoşbəxt Yusifzadənin vəfayıyla bağlı birdəqiqəlik sükut elan olundu.
* 5-ci dəqiqədə “Forza Neftçi” polislər pankart açmağa icazə vermədiyi üçün tribunanı tərk etdi.
* 53-cü dəqiqədə “Neftçi”nin məşqçisi Alin-Nikolae Çita hakimin qərarına etiraz etdiyinə görə sarı vərəqə ilə cəzalandı.
* 70-ci dəqiqədə “Qarabağ” azarkeşləri “Samir Abasov” şüarlarını səsləndirməyə başladılar.
* 83-cü dəqiqədə “Neftçi”nin məşqçisi Sənan Qurbanov hakimin qərarına etiraz etdiyi üçün qırmızı vərəqə ilə cəzalandı.
* 2-ci qoldan sonra Brkiç “Neftçi”nin ehtiyat oyunçuları skamyasından kiməsə əli ilə etiraz etdi.
* Cica 2-ci qolu vurduqdan sonra Elvin Cəfərquliyev öz azarkeşləri önündə qeyri-adi şəkildə sevindi.
* Görüşün sonlarında “Qarabağ” azarkeşləri “Mutu, istefa” şüarlarını səsləndirdilər.
* Qarşılaşmadan sonra “Neftçi”nin məşqçisi Miodraq Todorov hakimin qərarına etiraz etdiyi üçün qırmızı vərəqə ilə cəzalandı.

İLKİN SULTANLI