Qadın voleybolçulardan ibarət "Azərreyl" komandası Çağırış kubokunun 1/16 final mərhələsinin ilk oyununda İspaniya "Avarka de Menorka"sını Bakıda məğlub etməyi bacardı - 3:1 (23:25, 25:15, 25:19, 25:23).

Oyundan sonra "dəmiryolçular"ın kapitanı Aynur İmanova "Football-plus.az"ın bəzi suallarını cavabladı.

- Oyunla bağlı təəssüratların maraqlıdı.
- Zəfər və Bayraq günlərində ölkəmizə daha bir qələbəni yaşatdığımız üçün qürür duyuram. Hisslərimi sözlə ifadə edə bilmərəm. Çox möhtəşəm gün idi. Bu münasibətlə ölkə rəhbərini, xalqımızı, federasiyanı, klub prezidentini, texniki heyəti, komanda yoldaşlarımı təbrik edirəm. Qələbəmizi də şəhidlərimizin xatirəsinə həsr edirəm. Onların ruhu qarşında baş əyirik. Allah rəhmət eləsin. "Balta" ilə oyunlardan sonra komandanın statisi və məşqçimiz "Menorka" haqda məlumat toplamağa başladı. İspaniya təmsilçisi ilə matçdan əvvəl ölkə çempionatında oyunumuzun olduğunu bilirdik. Buna görə də biz "Abşeron"u yox, avrokuboklardakı görüşü daha ciddiyə alırdıq.

- Qələbənizdə nə əsas rol oynadı?
- Rəqibin oyunçuları bizdən fərqli bir yerdə daha çox oyun keçirmişdi. Buna baxmayaraq, ispanların oyun sistemini poza bildik, onları yaxşı təhlil etməyi bacardıq. "Balta" ilə matçdan sonra bütün diqqətimizi İspaniya təmsilçisinə kökləmişdik. Məşqçilər heyəti onlar haqda bizə geniş məlumat verdi. Bilirdik ki, "Menorka" ukraynlılardan daha güclüdü. Amma oyuna ciddi hazırlaşmağımız bizə zəfəri gətirdi.

- Belə nəticəni gözləyirdiz?
- Əlbəttə, qalib gələcəyimizi düşünürdük. "Menorka"nın ciddi rəqib olduğunu bilirdik, ancaq biz də güclüyük.

- Komandanızın hansı mövqeyində çatışmazlıq olduğunu düşünürsən?
- Düşünürəm ki, çatışmayan mövqeyimiz yoxdu. Bəlkə də oyunçular yenidi və matç zamanı qurduğumuz taktikanı tam yerinə yetirə bilmir. Ancaq bunu qarşıdakı oyunlarda düzəldə biləcəyik.

CAVİD ƏLİYEV