Ölkəmizi Çağırış kubokunda təmsil edən qadın voleybolçulardan ibarət “Azərreyl” 1/16 finalda İspaniya “Avarka de Menorka”sına rəqib oldu.

Rəqibin baş məşqçisi Bep Lorens Markes bu görüşlərlə bağlı “Football-plus.az”ın bəzi suallarını cavabladı.

- “Azərreyl”in “Balta” ilə oyunlarına baxmısız?
- Bəli, Bakıda keçirilən hər iki oyunu izləmişik. Amma “Azərreyl”i bir az da təhlil etməliyik. İndi qarşıda bizi İspaniya çempionatında vacib oyun gözləyir. Heyət baxımından yeni komandayıq və nəticə qazanmaq üçün səviyyəmizi qaldırmalıyıq.

- Sizcə, qələbə qazanmaq baxımından hansı amil əsas rol oynayacaq?
- Düşünürəm ki, “Azərreyl” hücumda bir az daha yaxşıdı. Lakin biz də intensiv oynayan kollektivik. Buna görə də bizi məğlub etmək çətin olacaq.

- “Azərreyl”in heyətində hansı oyunçu diqqətinizi çəkdi?
- Xorvatiyalı Katarina Pilepiçi deyərdim. Güclü oyunçudu. Amma Bakı təmsilçisi ümumilikdə yaxşı komandadı.

- Bakıdakı oyunla bağlı nə düşünürsüz?
- Düşünürəm ki, cütün taleyinə İspaniyada aydınlıq gələcək. Bakıya inkişaf etməkdə olan kollektivlə yollanacağıq. Bəzi oyunçularımız yığmanın oyunlarına görə düşərgəyə gec qoşuldu. Lakin indi tam heyətlə toplanış keçirik. Həmçinin də İspaniya çempionatının səviyyəsi yaxşıdı. Bu məqam da oyunumuza təsir edəcək.

Xatırladaq ki, bu komandalar arasındakı ilk oyun noyabrın 9-da Bakıda, cavab görüşü isə 15-də səfərdə keçiriləcək.

CAVİD ƏLİYEV