“Məşqçilər heyəti noyabrın 9-u üçün əla plan hazırlayıb” - “Azərreyl”in rumın ulduzu
2 gün öncə qadın voleybolçular arasında ölkə çempionatında yeni mövsümə start verildi.
Açılış matçında "Azərreyl" ilə "Abşeron" üz-üzə gəldi. Görüş “dəmiryolçular”ın məğlubiyyəti ilə yekunlaşdı - 1:3 (25:27, 25:23, 16:25, 20:25).
Oyundan sonra “Azərreyl”in rumıniyalı hücumçusu Ana-Mariya Berdila fikirlərini “Football-plus.az” saytı ilə bölüşdü:
“Düşünürəm ki, komanda olaraq, yaxşı oyun göstərə bilmədik. “Abşeron”a çox şans verdik. Rəqib müdafiədə əla oynadı. Bizim vacib hücumlarımızın qarşısını aldırdılar. Bundan sonra daha fərqli “Azərreyl” görəcəksiz. Heç bir əskik yoxdu. Sadəcə, bu kimi şeylər bir qədər zaman tələb edir. Növbəti oyunumuz evdə İspaniya “Menorka”sına qarşıdı. Bu matça ciddi hazırlaşırıq. Qarşıdakı çətin oyunları da səbirsizliklə gözləyirik”.
30 yaşlı voleybolçu noyabrın 9-da Çağırış kubokunun 1/16 final mərhələsində Bakıda qonaq edəcəkləri “Menorka” ilə oyun barədə də fikirlərini bildirdi:
“Bacardığımız kimi oynasaq, inanıram ki, qalib gələcəyik. Şansımız böyükdü. Məşqçilər heyəti noyabrın 9-u üçün əla plan hazırlayıb”.
Xatırladaq ki, Azərbaycan çempionu "Avarka de Menorka" ilə noyabrın 9-u, saat 19.00-da Dərnəgüldəki Voleybol Mərkəzində üz-üzə gələcək. İkinci oyun isə noyabrın 15-nə təsadüf edəcək. İspaniyadakı görüş Bakı vaxtı ilə saat 22.00-da başlayacaq.
CAVİD ƏLİYEV
