Çempionlar Liqasının Dortmundda keçirilən “Borussiya” – “Nyukasl” matçında (2:0) aksiya təşkil edilib.

"Football-plus.az" xəbər verir ki, “Borussiya”nın azarkeşləri UEFA-nın Çempionlar Liqasının növbəti mövsümündən yeni format tətbiq etməklə bağlı qərarına etiraz ediblər. Onlar oyun zamanı etiraz əlaməti olaraq meydana saxta “qızıl külçə”lər və tennis topları atıblar. Almaniya klubunun azarkeşləri həmçinin “X” sosial şəbəkisində paylaşımlar edərək “Siz idmanla maraqlanmırsınız. Sizi maraqlandıran yalnız puldu” yazıblar.

Çempionlar Liqasının yeni formatı 2024/2025 mövsümündən qüvvədə olacaq. Turnirin əsas mərhələsində 36 klub iştirak edəcək. Yeni formata əsasən, hər komanda 8 fərqli rəqibə qarşı 8 oyun (4-ü öz meydanında, 4-ü rəqib meydanında) keçirəcək. Oyunların nəticələrinə əsasən ümumi turnir cədvəli tərtib olunacaq. Ümumi mərhələdən ən yaxşı 8 yeri tutacaq komanda birbaşa 1/8 finala çıxacaq. Qalan 8 vəsiqə uğrunda isə 9-24-cü yerləri tutan komandalar pley-off formatında mübarizə aparacaqlar.