UEFA növbəti iki mövsümdə (2023/24 və 2024/25) qitəmiqyaslı yarışların oyunlarında VAR sistemindən daha geniş istifadə edəcək. Bu barədə Ukrayna Futbol Assosiasiyasının (UFA) rəsmi saytı məlumat yayıb.

"Football-plus.az" xəbər verir ki, hakimə video-köməkçi texnologiyası ilk dəfə Avropa Liqasının (3-cü təsnifat mərhələsindən) və Konfrans Liqasının (pley-off mərhələsindən) təsnifat mərhələsində istifadə olunacaq.

VAR-ın artıq turnirin qrup mərhələsində də işləyəcəyini nəzərə alsaq, sistemin əhatə etdiyi Avropa Liqası oyunlarının sayı 26 faiz (36 oyun), Konfrans Liqası matçlarının sayı isə 31 faiz (140 oyun) artacaq.

VAR həmçinin Çempionlar Liqasının bütün seçmə mərhələlərində ilk dəfə tətbiq ediləcək. Nəticədə bu texnologiyadan istifadə edilən oyunların ümumi sayı 2022/2023 mövsümü ilə müqayisədə 63 matç artacaq. Sistem 2024/25 mövsümündən başlayaraq Avropa Liqasının 1-ci təsnifat mərhələsindən tətbiq olunacaq. UEFA-nın rəsmi saytının məlumatına görə, VAR matç sayının çox olması səbəbindən müvafiq texniki-iqtisadi əsaslandırmaya əsasən, Konfrans Liqasının seçmə mərhələsinin pley-offundan əvvəl də tətbiq oluna bilər.