Bilindiyi kimi, avrokubokların növbəti mövsümü yeni format üzrə keçiriləcək. Maraqlıdı ki, bununla bağlı iki il əvvəl qərar verən UEFA artıq növbəti format variantını nəzərdən keçirir.

"Football-plus.az" xəbər verir ki, bu məlumatı “Marca” qəzeti yayıb.

İspaniyanın populyar idman nəşrinin yazdığına görə, UEFA və Avropa Klublar Assosiasiyası üç divizionun - Superliqa, Avropa Liqası və Namizədlər Liqasının tətbiqi variantını nəzərdən keçirir. 2-ci və 3-cü divizionlar arasında daha yüksək liqada oynamaq uğrunda 4 yer üzrə pley-off oyunlarının təşkili də nəzərdə tutulub. Plana əsasən 1-ci və 2-ci divizionlar arasında isə yalnız iki yer üçün pley-off oyunları keçirilə bilər. UEFA-nın İcraiyyə Komitəsinin oktyabrın sonunda bu məsələni müzakirə edəcəyi gözlənilir. Yeni format qəbul ediləcəyi təqdirdə 2027-ci ildən tez qüvvəyə minməyəcəyi gözlənilir.

Xatırladaq ki, 2024/25 mövsümündən Çempionlar Liqasının yeni formatı qüvvədə olacaq. Turnirin əsas mərhələsində 36 klub iştirak edəcək. Yeni formata əsasən, hər klub 8 fərqli komandaya qarşı 8 oyun (4-ü öz, 4-ü rəqib meydanında) keçirəcək. Matçların nəticələrinə əsasən, ümumi turnir cədvəli tərtib olunacaq. Ümumi mərhələdən ən yaxşı 8 yeri tutan komanda birbaşa 1/8 finala çıxacaq. Digər 8 vəsiqə uğrunda 9-24-cü yerləri tutan komandalar pley-off formatında mübarizə aparacaqlar. Bu format Avropa Liqası və Konfrans Liqasında da tətbiq olunacaq.