Misli premyer-liqasında 12-ci tur davam edir.

“Football-plus.az” xəbər verir ki, “Sumqayıt” “Araz-Naxçıvan”ı qəbul edib - 2:0. Matçdan sonra qonaqların çalışdırıcısı Azər Bağırovun mətbuat konfransı keçirilib. Sizi onun fikirləri ilə tanış edirik:

- Nəticənin bu cür olmasının əsas səbəbi nədi?
- Yerli futbolçular baxımından rotasiya etmək üçün geniş heyətimiz yoxdu. Legionerlərlə bağlı problem yoxdur. Bu gün Bayraməlini meydana buraxdıq. Özünü göstərməyə çalışdı. Kimisə qazandırmaq, yoxdan var etmək istəyirik. Maksimum edə biləcəyimiz budu. Əsas sıxıntımız yerli oyunçuların kasadlığıdı.

- Ötən turda "Qarabağ" üzərində qazanılan qələbə arxayınlıq yaratmamışdı?
- İnanmıram belə bir şey olsun. Vacib olan odu ki, nə etdiyimizi bilirik. Uduzduğumuz zonaları bilirik. Bunun üzərində çalışmaq lazımdı.

- Orxan Əliyevi start heyətində görəcəyik?
- Son iki oyunda Orxan heyətdə idi. Bu gün onun səhhətində problem var idi. Zəhərlənmişdi.

- Avrokuboklar hədəfiniz var?
- Bu haqda düşünmürük. Bizim işimiz komandanı oyundan oyuna hazırlamaqdı. Qış fasiləsinə kimi maksimum xallar yığmağa çalışacağıq. Bu gün "Araz-Naxçıvan" üst pillələrdədisə, başımızdan yuxarı tullanmışıq.

- Mövsüm başlayanda əsas hədəf liqada qalmaq idi?
- Yox. Hədəfimiz sırf çempionatda qalmaq deyildi. Realist olmaq lazımdı. Şəraitimiz çoxlarından aşağıdı.

- Qış fasiləsində transfer etmək istədiyiniz yerli oyunçular var?
- Var. Amma klubları onları bizə verəcək-vermeyəcək, bu sual altındadı. Transfer pəncərəsi zamanı dəvət göndərəcəyik. Müqaviləsi olan oyunçu ilə danışmaq etik deyil, bizə yaraşmır.

- Kinorejissor Tahir Tahirov sizi ölkənin bir nömrəli baş məşqçisi hesab edir. Buna münasibətiniz necədi?
- Tahir müəllim "Qarabağ"la oyundan sonra bir az emosiyalara qapıldı. Bizim sevdiyimiz şəxsdi. Heç kim deyə bilməz ki, Azərbaycanda Qurban Qurbanovdan böyük məşqçi var. Tahir müəllim naxçıvanlıdı, Naxçıvan futbolunu sevir.