"Hər şeyə rəğmən mövsüm yeni başlayıb" - Azər Məmmədov
"Kəpəz" Misli premyer-liqasının 5-ci turunda "Araz-Naxçıvan"ı qəbul edib - 1:2.
"Football-plus.az" xəbər verir ki, Gəncə təmsilçisinin baş məşqçisi Azər Məmmədov matçdan sonra keçirilən mətbuat konfransında jurnalistlərin suallarını cavablandırıb. Sizi mütəxəssisin fikirləriylə tanış edirik:
"Oyunun əhəmiyyətini bilirdik. Çempionatda "Araz-Naxçıvan" əsas rəqibimizdir. Bu matç bizim üçün 6 xallıq idi. Təəssüf ki, 6 xalı "Araz-Naxçıvan"a verdik. İki fərqli hissə izlədik. İlk yarıda 5 dəqiqəyə 2 top buraxdıq. Qollar öz səhvlərimizdən oldu. Bundan sonra komanda toparlanmaqda çətinlik çəkdi. İkinci hissədə futbolçular fərqi aradan qaldırmağa çalışdı. Hər şeyə rəğmən mövsüm yeni başlayıb. Qarşıda uzun marafon var. İşləmək lazımdı. Hücumda dişsizlik görünür. Çalışacağıq ki, milli fasilədə çatışmazlıqları aradan qaldıraq".
- Bu gün ikinci hissədə bəlkə də mövsümün ən yaxşı oyununu keçirdiniz. Bu fikirlə razısınız?
- Razıyam. "Neftçi" ilə matçda çempionat yeni başlamışdı. Artıq oyunçular bir-birinə uyğunlaşıb. Getdikcə daha fərqli futbol oynamağa çalışırıq. Gəncədə məğlub olmamalıydıq. Heç-heçə pis nəticə olmazdı.
- Mate Kvirkiyanın start heyətində olmamasının səbəbi nədi?
- "Turan Tovuz"la matçda zədələnmişdi. Uzun müddət idi ki, komanda ilə məşq etmirdi. Onun gücü hələ 45 dəqiqəlik deyil. 30 dəqiqə oynatmağı düşünürdük. Hücumda axsama gördük. Buna görə də Mateni meydana buraxdıq.
- Transfer məsələləri nə yerdədi?
- Baxışda iki futbolçu var. İkisi də hücum oyunçusudu. Bəyənsək, müqavilə imzalayacağıq. "Araz-Naxçıvan"la matça hazırlaşırdıq deyə onlara çox da baxa bilmədik.
Digər xəbərlər
