Misli premyer-liqasında 27-ci turun oyunları keçirilir.

"Football-plus.az" xəbər verir ki, "Səbail" "Turan Tovuz"u qəbul edib - 1:1. Matçdan sonra qonaqların çalışdırıcısı Ayxan Abbasovun mətbuat konfransı keçirilib. Sizi mütəxəssisin fikirləri ilə tanış edirik:

- Qələbəyə ümidli idiz, yoxsa heç-heçəni qorumaq istəyirdiz?
- Belə matçlarda əvvəldən heç-heçə düşünmək yanlışlıq olar. Birinci hissənin ilk 20 dəqiqəsində oyun mərkəzdə gedirdi. Ötürmələrdə səhvlərə yol verdik. İkinci hissədə aktiv idik, topa sahib olduq, cinahlardan hücumlar etdik. Bu cür matçlar mübarizəlidir. Dördüncü dövrə bundan da sərt keçəcək. Xal fərqi yaxın olduğu üçün rəqiblər oyun baxımından çox risk etməyəcəklər. Heç kim sonuncu yeri tutmaq istəmir. Bizim də yuxarı qalmaq şansımız var. Stabillik çatmır. Bəzi oyunlarda qələbə qazana bilsəydik, daha yuxarı qalxardıq. Vaxt lazımdı.

- Xəyal Nəcəfovun yoxluğu mərkəzdə oyununuza təsir göstərdi?
- Əlbəttə. Xəyal xəstə idi, qızdırması var. Oyun getmirdi, bir anlıq onu döyüşə atmaq istədim. Sonra fikirləşdim ki, ən yaxşısı dincəlməyidi. Onun yoxluğu bizim üçün böyük itkidi.

- "Səbail"lə 10 xallıq fərqi qorudunuz. Bu nəticədən sonra dərindən nəfəs aldınız?
- Əlbəttə dördüncü dövrəyə 10 xallıq fərqlə getmək üstünlükdü. Rəqib qalib gəlsəydi, xal fərqi azalacaqdı. Bu baxımdan üstünlüyü qoruduq.

- İki həftəlik fasilə zamanı yoldaşlıq oyunu keçirəcəksiz?
- Tovuzda təlim-məşq toplanışında olacağıq. Öz əvəzedici heyətimizlə oynayacağıq.

- 4 oyundur qələbə qazana bilmirsiz. Belə halda futbolçuları motivasiya etmək çətin olmur?
- Motivasiya baxımından elə bir problem yoxdu. "Zirə"yə qarşı yaxşı oynasaq da, məğlub olduq. Çempionatda belə 4-5 oyunluq seriyalar olur. İkinci dövrədə də bunu yaşamışıq. Qalib gələ bilməyəndə məğlub olmaq olmaz. Hər xal dəyərlidir. Futbolçular istəklidi.

- Tərlan Əhmədli ilk dəfə deyil ki, bu cür qol buraxır. Sanki, uzaqdan vurulan topları çıxarmaqda çətinlik çəkir...
- Oyundan əvvəl rəqib haqda çox danışmışdıq, təhlil etmişdik. Ən çox da Qomisin zərbələrinin üzərində çalışırdıq. Öncə gərək o zərbəyə imkan verməyək. Çox rahat şəkildə mərkəzə meyilləndi və zərbə vurdu. Epizodq baxdıq, bir az çətin top idi. Qapıçını qınamaq düzgün olmaz. Top son anda istiqamətini dəyişdi.