Misli premyer-liqasında "Araz-Naxçıvan" səfərdə "Qəbələ"ni məğlub edib - 4:1.

"Football-plus.az" xəbər verir ki, matçdan sonra qonaqların çalışdırıcısı Azər Bağırovun mətbuat konfransı keçirilib. Sizi onun fikirləri ilə tanış edirik:

- Hesabın belə olacağını gözləmirdiniz?
- Sığortalı iş görməyi xoşlayıram. Açıq futbol alındı. Bu gün biz daha dəqiq olduq. Biz qol vurandan sonra rəqib irəli atıldı. Bundan sonra istədiyimiz futbolu göstərə bildik.

- Bəyənmədiyiniz məqamlar oldu?
- Əlbəttə. İlk 20 dəqiqədə müdafiədə zəif oynadıq. Bunu aradan qaldırmaq lazımdı.

- Hazırkı heyet avrokuboklar üçün yetərlidi?
- Bu haqda hələ ki, fikirləşmirik. Daha yaxşı "Araz-Naxçıvan" görmək istəyirik. Qışda nələrisə düşünəcəyik. Hələ qarşıda 8 oyunumuz var.

- Tez-tez rotasiyalar etməyinizin səbəbi nədi?
- Rəqibə görə bunları edirik. Futbolçu meydançada olmalıdı. Bizim heyətlə rotasiya qaçılmazdı.

- Hər qələbədən sonra avrokuboklar haqda düşünməyə başlayırsız?
- Yox. Mənim hazırda elə bir iştahım yoxdu. Vaxtımı komandanı oyundan-oyuna hazırlamağa sərf edirəm.

- Artıq Azərbaycanda ən yaxşı gənc məşqçilərdən hesab olunursuz. Bu cür uğuru gözləyirdiz?
- Hələ heç nə etməmişik. Mən premyer-liqada çalışmaq üçün U-11-dən yuxarı qalxmışam. Burda debüt etmək üçün çox gözləmişəm.

- Adınız milli komandaya namizəd göstərilir. Buna münasibətiniz necədi?
- Hər əsgərin fikri general olmaqdı. Əlbəttə ki, bizim də düşüncəmiz yuxarılarda işləməkdi. Bir məşqçi kimi mənim də hədəflərim var. Zamanı gələndə niyə də olmasın? Bu, zamana bağlı məsələdi.

- Azər Bağırova millidə işləmək üçün nə qədər vaxt lazımdı?
- Bunu funksionerlər yaxşı bilər. Hər zaman milli komandalarda çalışmaq istəmişəm. Hər hansı səbəbdən alınmayıb. Biz balaca adamlarıq. İşimiz komandanı oyunlara hazırlamaqdı.

- Bu gün millidən təklif gəlsə, qəbul edərsiz?
- Millidən təklif gəlsə, kim qəbul etməz ki? Amma bu barədə hələ heç düşünməmişəm.

- Yükün altına girməkdən çəkinirsiz?
- "Araz-Naxçıvan"ı götürəndə yüküm daha çətin idi. Artıq Azərbaycan futbolunda olmayan bir çox oyunçuları premyer-liqaya gətirmişik. Əlbəttə ki, onların əziyyəti də var. Vadim Abdullayevi Rusiyadan tutub gətirmişəm. İdmanda daim təzyiqlərə hazır olmalısan. Mən özüm də həmişə buna hazır olmuşam. Amma sınmadım.

- Növbəti turda "Qarabağ"la qarşılaşacaqsız. Rəqibin Avropa Liqasında oynamasından istifadə edib xal almaq olar?
- "Qarabağ"ın heyəti çox yaxşıdı. Oyunçuların keyfiyyəti Azərbaycan futbolundan üstündü. Çətin oyun olacaq. Mübarizə aparmalıyıq.