İspaniya Kral Futbol Federasiyasının prezidenti Luis Rubiales qadınlar arasında dünya çempionatının finalından sonra yığmanın oyunçusu Cenni Ermosonu öpdüyünə (hərçənd fotolentə baxanda xanım futbolçunun da bu öpüşdə ən azı onun qədər maraqlı olduğu görünür) görə inanılmaz təzyiq görməkdədi. Əcnəbi həmkarlarımız fürsət düşmüşkən onun bəzi başqa əməllərini də eşələməyə çalışır. “The Sun” da bu yolu tutub.

“Football-plus.az” xəbər verir ki, Luis Rubiales şəkildə gördüyünüz dəbdəbəli villada İspaniya Kral Futbol Federasiyasından olan həmkarları ilə seks gecələri təşkil edib. “The Sun”a çatan məlumata görə, pandemiyanın qızğın vaxtı keçirilən məclisdə 8-10 arası gənc qız iştirak edib, onları villaya Rubialesin dostlarından biri gətirib. Əyləncə məclisi necə səs-küylü olubsa, qəzəbli qonşular səhər saat 6-ya qədər yata bilməyiblər.

“Villa Luxury Paradise” elit Salobrena rayonundakı təpələrdə, federasiya prezidentinin doğulduğu və böyüdüyü Qranadadan bir neçə mil məsafədə yerləşir. Hərçənd Rubiales artıq prezident deyil – İspaniya yığmasının dünya çempionatının finalındakı qələbəsindən sonra Cenni Ermosonu öpdüyünüə görə vəzifədən uzaqlaşdırılıb.

Bəs villa ilə bağlı informasiya hardan çıxıb? Ötən il antikorrupsiya araşdırması çərçivəsində sorğu-suala cəlb olunan Rubialesin əmisi deyib ki, Luis “orgiya üçün” dəbdəbəli villa icarəyə götürmək məqsədi ilə federasiyanın vəsaitindən qeyri-qanuni şəkildə yararlanıb. Rubiales bu açıqlamanı yaxın buraxmayıb və iddia edib ki, həmin villadan yalnız işgüzar görüşlər keçirmək üçün yararlanıb, orda müxtəlif cinslərdən olan adamların iştirakı ilə barbekü təşkil olunub, bir də İspaniyanın düyüdən hazırlanan milli yeməyi paelyadan dadıblar.

Qonşular bu versiya ilə razılaşmır: “Xatırlayıram, Rubiales burda olanda səsdən dayanmaq mümkün deyildi. Səhərin erkən çağlarına qədər bum, bum, bum, musiqi, içkilər və çoxlu qız… Onların səhər 5-6-ya qədər necə şənləndiklərini və güldüklərini eşidirdim. Burda bir neçə gün qaldılar”.

Yerli sakinlərdən birinin dediyinə görə, ev italiyalı xanım iş adamına məxsusdu: “Məclisin pandemiya vaxtı təşkil olunması adamı lap qıcıqlandırırdı. Ancaq biz polis çağırmadıq, çünki bədxah qonşulardan deyilik”.

Daşınmaz əmlak məsələləri ilə məşğul olan rielitor əlavə edir: “Bura elit rayondu, Luis burda problem yaşamayacağını bilir. Onun ailəsini burda yaxşı tanıyırlar və sevirlər, ailə böyük təsirə malikdi”.

Luisin əmisi Xuan Rubiales Madrid məhkəməsində demişdi ki, onun vəzifələri sırasına “prezidentin həyatını yüngülləşdirmək daxil olub, yəni səfərlərin təşkili və əlaqələndirilməsi, Direktorlar Şurasının işinin təşkili”.

Futbol qurumunun sabiq mətbuat katibi isə bildirib ki, dəbdəbəli villa istisnasız Luisin və yaxın ətrafının rahatlığı üçün icarəyə götürülüb, oranın xərcləri korkorativ kartların köməyi ilə ödənilib. Mətbuat katibinin dediyinə görə, villaya 8-10 gənc qız dəvət olunub. Sonradan üzə çıxıb ki, qızları bura Luisin dostu Fransisko Xavyer Martin Alkayde gətirib. O, sabiq futbolçu və otel sahibidi. Şəkildə gördüyüz məşhur villanın 210 kvadrat metr ərazidə yerləşdiyi, üç terrasının, hovuzunun, bağının və qarajının olduğu da məlumdu.