Luis Rubialesin məlum hərəkəti ətrafında gərginlik durmadan artır. FİFA İspaniya Futbol Federasiyasının (İFF) prezidentini müvəqqəti vəzifəsindən kənarlaşdırıb.

“Football-plus.az” xəbər verir ki, təşkilatın mətbuat xidmətinin məlumatında qərarın avqustun 26-da qüvvəyə mindiyi və funksionerə qarşı intizam işinin başlanmasına qədər 90 gün davam edəcəyi bildirilib. Bundan əlavə, FİFA-nın Nizam-İntizam Komitəsinin sədri Horze İvan Palasionun göstərişinə əsasən, Rubialesə ispaniyalı qadın futbolçu Cennifer Ermoso və onun yaxınları ilə şəxsən və ya üçüncü şəxslər vasitəsilə əlaqə saxlamağa cəhd etmək qadağan edilib. FİFA bütün insanların toxunulmazlığına hörmətlə yanaşmağa mütləq sadiqliyini bir daha təsdiqləyir və buna görə də hər hansı əks davranışı ən sərt şəkildə pisləyir.

Bir daha xatırladaq ki, avqustun 20-də İspaniyanın qadınlardan ibarət yığması dünya çempionatının finalında İngiltərəyə qalib gələrək (1:0) tarixində ilk dəfə çempion olub. Rubiales mükafatlandırma mərasimi zamanı Eermosonun dodağından öpmüşdü. O, avqustun 25-də bu hərəkəti ilə səhv etdiyini, lakin istefa vermək fikrində olmadığını açıqlamışdı. İFF-nin prezidenti Cennifer ilə aralarındakı öpüşün qarşılıqlı razılıq əsasında olduğunu bildirmişdi.

Amma Rubialesin bu açıqlamasından sonra İspaniya millisinin bəzi futbolçuları o, vəzifəsindən getməyəcəyi təqdirdə yığmada oynamayacaqlarını bəyan ediblər. İFF-nin rəhbərinə dövlət səviyyəsində də təzyiq olunur. Federasiya buna görə UEFA-ya müraciət edib. Lakin qitə futbol qurumu bu məsələyə qarışmayacağını bəyan edib.

Vəziyyətin getdikcə ciddiləşdiyini görən Rubialesin anası Angeles Bexar kilsədə aclıq aksiyasına başlayıb. “Marca” qəzetinin məlumatına görə, qadın Motrildəki kilsədədi. O, “oğlunun üzərində gedən qeyri-insani və qanlı ov” davam etdikcə aclıq aksiyasına son verməyəcəyini bildirib. Bexara bu aksiyada bacısı da dəstək verir. O, Rubialesin öpdüyü Ermosodan həqiqəti söyləməsini və qalmaqalın əvvəlində danışdığı hadisələrlə bağlı olan versiyaya sadiq qalmağı tələb edib. Ana hesab edir ki, oğlu ilə Ermoso arasındakı öpüş razılaşdırılıb, fotoşəkillər də sübut edir ki, qıza qarşı cinsi istismar olmayıb. Bexar hamını anlayışa çağırıb. Onun fikrincə, bu hadisə hər kəsin başına gələ bilər.