Braziliya çempionatında son bir həftədə iki tur baş tutdu.

“Football-plus.az” xəbər verir ki, 27-ci və 28-ci turun oyunlarından sonra çempionluq yarışında intriqa bir qədər gücləndi. Ona görə ki, lider “Botafoqo” 2 oyuna 4, əsas izləyicisi “Braqantino” isə 6 xal qazandı. Nəticədə bu komandalar arasındakı xal fərqi 9-dan 7-yə düşdü.

“Botafoqo” baş məşqçi kimi fəaliyyəti yalnız təxminən üç ay çəkən Bruno Lajenin istefaya göndərilməsindən sonra yola müvəqqəti çalışdırıcı ilə davam edir. Xatırladaq ki, Lusio Flavionun debütü uğurlu alınmışdı: A seriyasının lideri 26-cı turda səfərdə “Fluminense”nin qapısından iki cavabsız top keçirməklə bu komandanın evdə 13 matçlıq məğlubiyyətsiz, özünün isə 4 oyunluq qələbəsiz seriyasına son qoymuşdu. Rio de janeyrolular növbəti iki turda hesabına 4 xal yaza bildilər. Əvvəlcə autsayder “Amerika Mineyro” səfərdə məğlub edildi. 2:1 hesablı qələbədə dubl edən Junior Santos böyük rol oynadı. Növbəti turun “Atletiko Paranaense” ilə ev oyunu isə 1:1 hesabı ilə nəticələndi. Meydan sahiblərini 24-cü dəqiqədə önə keçirən 32 yaşlı hücumçu Tikinyo Soares bu mövsüm A seriyasında 16-cı qolunu vurmaqla bombardirlərin siyahısında liderliyini bir qədər də möhkəmləndirdi. Onun komandası isə mövqeyini qorudu.

Doğrudu, “Botafoqo”nun mövqeyi istənilən halda dəyişməyəcəkdi. Amma indi rio de janeyrolular əsas izləyicisini 9 yox, 7 xal qabaqlayırlar. Ona görə ki, tura 2-ci yerdə başlayan “Braqantino” iki oyunda xal itirmədi. Son həftələr yüksəlişdə olan Pedro Kayşinyanın çalışdırdığı komanda səfərdə “Santos”a 3:1, evdə “Fluminense”yə 1:0 hesabı ilə qalib gələrək 2-ci yerdə qaldı. Çempionatın son 6 oyununda 5 qələbə qazanıb 1 dəfə heç-heçə edən “Braqantino”nun indi liderdən 7 xal geri qalması Braqança Pulista sakinlərini bir qədər də ümidləndirdi.

26-cı turdan sonra 3-cü yerdə olan “Qremio” isə azarkeşlərinə böyük məyusluqlar yaşatdı. Renato Qauşunun komandası son iki oyunda da xal qazana bilmədi. “Atletiko Paranaense”yə 1:2, “San Paulu”ya 0:3 hesablı məğlubiyyətlər portu aleqrililəri cədvəlin 6-cı pilləsinə saldı.

“Palmeyras”ın titulu qorumaq ehtimalı turdan-tura azalır. Son çempion sanki Libertadores Kubokunun yarımfinalında mübarizəni dayandırandan sonra A seriyasına marağını böyük ölçüdə itirib. Abel Ferreyranın komandası 27-ci turun “Atletiko Mineyro” ilə ev oyununda iki cavabsız top buraxaraq uduzdu. Bu, san paululuların çempionatda ardıcıl 4-cü məğlubiyyəti oldu. Çempion uğursuz seriyaya “Koritiba” ilə oyunda son qoydu. 2:0 hesablı qələbə “Palmeyras”ı 4-cü yerdə saxladı. Amma “yaşıllar” indi liderdən 12 xal geri qalırlar. Deməli, finişə 10 tur qalmış titulun qorunma ehtimalı yetərincə azdı...
“Qremio”nun məğlubiyyətləri sıralaması “Flamenqo”nun işinə yaradı. Deyəsən, Xorxe Sampaolinin istefaya göndərilməsi rio de janeyrolularda azı psixoloji planda yaxşıya doğru dəyişikliyə səbəb olub. Rio de janeyroluların başına keçən Braziliya yığmasının sabiq baş məşqçisi Titenin debütü uğurlu alındı. 62 yaşlı mütəxəssisin yeni komandası “Kruzeyro” (2:0) və “Vasku da Qama” (1:0) üzərində qələbələrlə iki pillə irəliləyib 3-cü yerə qalxdı.

27-ci tur
Amerika Mineyro - Botafoqo RJ 1:2
Benites, 39 - Junior Santos, 22; 50.
Santos - Braqantino 1:3
Leo Ortis, 86-p. – Eduardo Saşa, 9; 29-p. Erik Ramires, 89.
Qremio - Atletiko Paranaense 1:2
Besotsi, 7 – Sapelli, 38. Kayke Roka, 90+2.
Palmeyras - Atletiko Mineyro 0:2
Halk, 2. Paulinyo, 76.
Kruzeyro - Flamenqo 0:2
Ayrton Lukas, 39. Pedro, 44-p.
Koritiba - Kuyaba 0:3
Deyverson, 24. Pitta, 82. Ranyele, 88.
Vasku da Qama - Fortaleza 1:0
Payet, 53.
Qoyas - San Paulu 2:0
Uqo, 10. Everton Morelli, 45+5.
Bayya - İnternasyonal 1:0
Byel, 44.
Fluminense – Korintians 3:3
Lima, 22; 56. Aryas, 84 – Yuri Alberto, 10; 27. Fabio Santos, 32-p.
28-ci tur
Botafoqo RJ - Atletiko Paranaense 1:1
Tikinyo Soares, 24 – Pablo, 41.
Braqantino - Fluminense 1:0
Eduardo Saşa, 17-p.
San Paulu - Qremio 3:0
Arauxo, 21. Pablo Maya, 68. Lusiano, 90+7.
Koritiba – Palmeyras 0:2
Qomes, 33. Pikeres, 45+3.
Flamenqo - Vasku da Qama 1:0
Jerson, 76.
Bayya – Fortaleza 2:0
Kanu, 22. Rafael Ratao, 90+6.
Kuyaba - Qoyas 1:1
Kleyson, 46 – Gilyerme Markes, 45+8-p.
Atletiko Mineyro – Kruzeyro 0:1
Jemerson, 87-öz qapısına.
İnternasyonal - Santos 7:1
Kevison, 1-öz qapısına. Alan Patrik, 14. Valensiya, 27; 61. Vanderson, 29. Bustos, 54. Luis Adriano, 75 – Silvera, 80.
Korintians - Amerika Mineyro 1:1
Gilyano, 90+9 – Benites, 38.
1. Botafoqo RJ 28 18 5 5 45-18 59
2. Braqantino 28 14 10 4 40-24 52
3. Flamenqo 28 14 8 6 41-31 50
4. Palmeyras 28 13 8 7 42-24 47
5. Atletiko Paranaense 28 12 9 7 41-32 45
6. Qremio 28 13 5 10 43-40 44
7. Atletiko Mineyro 28 12 7 9 32-22 43
8. Fortaleza 28 12 6 10 33-29 42
9. Fluminense 28 12 6 10 37-35 42
10. San Paulu 28 10 8 10 34-29 38
11. Kuyaba 28 10 7 11 30-31 37
12. İnternasyonal 28 9 8 11 30-33 35
13. Bayya 28 9 7 12 37-38 34
14. Kruzeyro 28 8 10 10 25-24 34
15. Korintians 28 7 12 9 34-36 33
16. Qoyas 28 7 10 11 28-38 31
17. Vasku da Qama 28 8 6 14 28-39 30
18. Santos 28 8 6 14 31-52 30
19. Koritiba 28 5 5 18 29-59 20
20. Amerika Mineyro 28 4 7 17 31-57 19
Bombardirlər: Tikinyo Soares (Botafoqo RJ) - 16, Markos Leonardo (Santos) – 12, Vitor Roke (Atletiko Paranaense), Paulinyo (Atletiko Mineyro) - 11.