Braziliya çempionatında 26-cı turun oyunlarından sonra çempionluq yarışında intriqa bir qədər də zəiflədi.

"Football-plus.az" xəbər verir ki, tur lider üçün ikiqat düşərli oldu: “Botafoqo” qalib gəldi, tura 2-8-ci yerlərdə başlayan 7 komanda isə hesabına ümumilikdə yalnız 3 xal yaza bildi. Nəticədə liderlə əsas izləyicisi arasındakı xal fərqi 7-dən 9-a çatdı.

“Botafoqo”nun son həftələr enişdə olması, əvvəlki 4 matçda yalnız 1 xal qazanmaqla mövqeyini şübhə altına salması Bruno Lajenin aqibətini müəyyənləşdirib. Rio de janeyroluların 25-ci turda “Qoyas”dan öz meydanında yalnız bir xal (1:1) ala bilməsi rəhbərliyi adekvat addım atmağa vadar edib: 47 yaşlı portuqaliyalı mütəxəssis istefaya göndərilib. Başqa sözlə, Lajenin baş məşqçi kimi fəaliyyəti yalnız təxminən üç ay çəkib. Komandanı növbəti oyuna Lusio Flavio çıxarmalı oldu. Baş məşqçinin səlahiyyətlərini müvəqqəti yerinə yetirən 44 yaşlı mütəxəssisin işi heç də asan deyildi. Lider səfərdə “Fluminense” ilə qarşılaşdı. Fernando Dinizin komandası isə bu mövsüm evdə uduzmamışdı: “Flu” liderlə prinsipial görüşə qədər əvvəlki adı “Marakana” olan stadionda keçirdiyi 13 matçdan 10 qələbə və 3 heç-heçə ilə ayrılmışdı. Gözlənildiyi kimi, Rio de Janeyro derbisi ev sahiblərinin üstünlüyü şəraitində keçdi. “Fluminense” bütün oyun komponentlərində rəqibi üstələdi. Lakin ev sahiblərinin əksər zərbələri hədəfdən yan keçirdi. Tərəflər oyun ərzində qapıya hərəyə 5 dəqiq zərbə endirdilər. Bu 10 zərbədən ikisi qolla nəticələndi. Hər iki halda hesabı qonaqlar dəyişdilər: Junior Santos ilə Tikinyo Soares iki dəqiqə ərzində “Botafoqo”ya əhəmiyyətli üstünlük qazandırdılar. 32 yaşlı hücumçu Tikinyo Soares bu mövsüm A seriyasında 15-ci qolunu vurmaqla bombardirlərin siyahısında liderliyini bir qədər də möhkəmləndirdi. Onun komandası isə derbidə 4 oyunluq qələbəsiz seriyaya son qoyaraq mövqeyini gücləndirdi.

“Botafoqo” indi əsas izləyicisini 9 xal qabaqlayır. Ona görə ki, tura 2-ci yerdə başlayan “Braqantino” iki xal itirdi. Ardıcıl 3 qələbə qazanaraq son həftələr yüksəlişdə olan Pedro Kayşinyanın çalışdırdığı komanda səfərdə “Atletiko Paranaense” ilə 1:1 hesablı heç-heçəyə razılaşdı. Amma qələbə seriyasının qırılması “Braqantino”nun mövqeyinə təsir etmədi.

Hesabat turu ərəfəsində hərəyə 44 xal toplayan komandalar məğlub oldular. “Qremio” səfərdə “İnternasyonal”a 2:3 hesabıyla uduzdu. Matçda son nöqtəni 74-cü dəqiqədə Luis Suares qoydu. A seriyasında keçirdiyi 22-ci oyunda 9-cu qolunu vuran 36 yaşlı uruqvaylı hücumçunun bu liqada 6 dəfə assistentlik etdiyini də bildirək. Renato Qauşunun komandası xal qazana bilməsə də, 3-cü yerdə qaldı.

Ona görə ki, “Qremio”dan qələbə sayına əsasən geri qalan “Palmeyras” da uduzdu. Qeyd edək ki, son günlər əsas diqqətini Libertadores Kubokunun oyunlarına yönəldən Abel Ferreyranın komandası A seriyasında ardıcıl iki məğlubiyyətlə 4-cü yerə düşmüşdü. “Santos”la ev oyunu da san paululular üçün uğursuz alındı. Hesabı onlar açsalar da, iki top buraxaraq növbəti dəfə uduzdular. Ardıcıl üçüncü məğlubiyyətlə son çempionun 4-cü yerdəki mövqeyinə təsir etmədi. Amma reallıq budur ki, “Palmeyras” indi liderdən 11 xal geri qalır.

“Flamenqo” turu bir xalla başa vurdu. Qeyd edək ki, Xorxe Sampaoli istefaya göndərildiyi üçün komandanı “Korintians” ilə oyuna da müvəqqəti məşqçi çıxardı. 1:1 hesablı heç-heçə rio de janeyroluların 5-ci yerdə qalmasına şərait yaratdı.

26-cı tur
Fluminense - Botafoqo RJ 0:2
Junior Santos, 20. Tikinyo Soares, 22.
Atletiko Paranaense – Braqantino 1:1
Pablo, 40 – Erik Ramires, 34.
İnternasyonal - Qremio 3:2
Valensiya, 6. Vanderson, 49. Alan Patrik, 70 – Joao Pedro, 67. Suares, 74.
Palmeyras - Santos 1:2
Ze Rafael, 43 – Rinkon, 45+1. Markos Leonardo, 70.
Korintians - Flamenqo 1:1
Fabio Santos, 79-p. – Jerson, 54.
Qoyas - Bayya 4:6
Gilyerme Markes, 27; 45+2-p. Mateus Babi, 45+4. Joao Maqno, 52 – Everaldo, 15; 37; 53. Jilberto, 18. Rafael Ratao, 56. Byel, 90+5.
Vasku da Qama - San Paulu 0:0
Atletiko Mineyro – Koritiba 1:2
Halk, 59 – Mateus Byanki, 64. Slimani, 90+1.
Fortaleza - Amerika Mineyro 3:2
Lusero, 31. Maçuka, 56. Bruno Paçeko, 68 – Mastriani, 18-p.; 23.
“Kuyaba” – “Kruzeyro” oyunu oktyabrın 15-nə təxirə salınıb.

1. Botafoqo RJ 26 17 4 5 42-16 55
2. Braqantino 26 12 10 4 36-23 46
3. Qremio 26 13 5 8 42-35 44
4. Palmeyras 26 12 8 6 40-22 44
5. Flamenqo 26 12 8 6 38-31 44
6. Fortaleza 26 12 6 8 33-26 42
7. Fluminense 26 12 5 9 34-31 41
8. Atletiko Paranaense 26 11 8 7 38-30 41
9. Atletiko Mineyro 26 11 7 8 30-21 40
10. San Paulu 26 9 8 9 31-27 35
11. Kuyaba 25 9 5 11 26-30 32
12. İnternasyonal 26 8 8 10 23-31 32
13. Korintians 26 7 10 9 30-32 31
14. Santos 26 8 6 12 29-42 30
15. Kruzeyro 25 7 9 9 24-22 30
16. Bayya 26 7 7 12 34-38 28
17. Vasku da Qama 26 7 6 13 27-38 27
18. Qoyas 26 6 9 11 25-37 27
19. Koritiba 26 5 5 16 29-54 20
20. Amerika Mineyro 26 4 6 16 29-54 18
Bombardirlər: Tikinyo Soares (Botafoqo RJ) - 15, Markos Leonardo (Santos) – 12, Vitor Roke (Atletiko Paranaense) - 11.