Heç şübhəsiz, basketbol üzrə ölkə çempionatında yeni mövsüm maraqlı keçəcək. Bu liqaya rəng qatanlardan biri də "Gəncə" olacaq. Artıq "sarı-göylər" heyətinə bəzi legioner oyunçular qatıb. Bunlardan biri Derek Roudsdu.

30 yaşlı amerikalı komandaya keçidi və başqa suallar ətrafında "Football-plus.az"a eksklüziv müsahibə verdi.

- "Gəncə" yə keçidin necə oldu? Təklif kimdən gəldi?
- Menecerimin baş məşqçi Bedri Meriçlə münasibəti yaxşıdı. Onun vasitəsi ilə "Gəncə"yə keçidim.

- Ölkəmiz haqda əvvəllər eşitmişdin?
- Xeyr, bura gəlməmiş heç bir bilgim yox idi. Mən San Fransiskodanam, son 4 ildə Los-Ancelesdə yaşayırdım. Amma Gəncədə qalmaq mənim üçün fərqli həyat tərzi olacaq.

- Hədəflərin nədi?
- Komandamın qələbəsindən başqa konkret şəxsi hədəflərim yoxdu. Bəli, istəyirəm ki, bu liqanın ən yaxşı oyunçularından biri olum. Ancaq hazırkı hədəf mübarizə aparıb çempionluq qazanmaqdı.

- Bəs liqamızın səviyyəsi haqda məlumat toplamısan?
- Çempionat və komandalar barədə məlumat toplamadan bura gəlmişdim. Lakin eşitmişəm ki, bu il liqanız çox rəqabətli olacaq. İlk turda ötən mövsümün çempionu "Sabah"a qarşı oynayacağıq. Bu matçı səbirsizliklə gözləyirəm. Düşünürəm ki, "tələbələr" "qızıl" medalların son sahibi olduqları üçün onları çətin rəqib gözündə görməliyik.

- Bundan əvvəl Meksikanın "Tixuana" komandasında çıxış eləmisən.
- Bəli, Meksikada çıxış eləmişəm. Agentimin mənim üçün doğru qərar verdiyini düşünürəm. Çünki onun da baş məşqçi ilə münasibətləri yaxşıdı. Bedri Meriçin rəhbərliyi altında oynamaq əla fikirdi.

CAVİD ƏLİYEV