Bu mövsüm basketbol üzrə ölkə çempionatında mübarizə aparacaq komandalardan biri də “Neftçi”di. “Ağ-qaralar” heyətini tanınmış ulduzla gücləndirib. Belə ki, paytaxt təmsilçisi məşhur Hollivud aktyoru Adam Sendlerin və MBA ulduzları Lebron Ceymslə Antoni Edvardsın da yer aldığı “Hustle” (Təlaş) filminin setində iştirak edən Toraye Breyki transfer edib.

26 yaşlı basketbolçu bu keçid və başqa suallar ətrafında “Football-plus.az”a eksklüziv müsahibə verdi.

- “Neftçi”yə keçidin necə alındı?
- “Yunayted Sports” agentliyi mənə belə təklifin olduğunu dedi və dərhal Bakı haqda araşdırma aprdım. Ölkəniz xoşuma gəldi. Buna görə də təklifi qəbul etdim.

- Ölkəmizə uyğunlaşa bilirsən?
- Bura mənim çox sevdiyim yerdi. Şəhərin havasını və gözəl yerləri bəyəndim. Bir sözlə, hər şey əladı.

- Daha əvvəl ölkəmiz haqda eşitmişdin?
- İlk dəfə Azərbaycan haqda ötən yaz eşitmişəm. Ancaq ondan əvvəl heç bir məlumatım olmayıb.

- “Neftçi” ötən mövsüm o qədər də uğurlu çıxış eləmədi. Bu il yaxşı olacağınıza inanırsız?
- Bəli, inanıram ki, bu mövsüm uğur qazanacağıq. Hər gün məşq edirik və yaxşı heyətimiz var. Yaxınlarda Xaçmaz təmsilçisi “NTD İNDİNGO” ilə yoxlama görüşü də keçirdik.

- Məşhur Hollivud ulduzu Adam Sendlerin, eləcə də MBA-nın ulduzları Lebron Ceymslə Antoni Edvardsın yer aldığı “Hustle” filminə çəkilmisən. Bu necə oldu?
- “Hustle” filmi əla təcrübə idi. Üç fərqli səhnəni kənardan canlı izləmək şansım oldu. Delaver ştatının Uilminqton şəhərində keçiriən kastinqlər sayəsində filmdə rol aldım. Bir neçə həftə ulduz aktyor Adam Sendlerin yanında oldum. Orda onunla tanış olduq. İnanılmaz təcrübə yaşadım. Ulduz basketbolçu Lebron Ceymsin də rol aldığı filmə çəkilmək möhtəşəm idi.

CAVİD ƏLİYEV