Yeni mövsümdə voleybol üzrə ölkə çempionatında debüt edəcək komandalardan biri də “Gəncə”di.

“Sarı-göylər”in baş məşqçi postuna Sergey Çesnavitskini gətirməsi və həyata keçirdiyi transferlər bu mövsüm iddialı olacaqlarını göstərir.

Yenilərdən biri də 36 yaşlı braziliyalı Fernando Melodu. “Gəncə”yə keçidi və başqa suallar ətrafında “sambaçı” ilə söhbətləşdik.

- “Gəncə"yə gəlişin necə oldu?
- "Gəncə"nin lap əvvəldən mənim transferimdə israrlı olması bu keçiddə böyük rol oynadı. Burda məni çox yaxşı qəbul elədilər. Klub rəhbərliyinə təşəkkkürümü bildirirəm.

- Komandaya və Gəncəyə uyğunlaşa bilirsən?
- Həyatın hər sahəsində çətinlik var. Daha tez uyğunlaşan çox az əziyyət çəkir. Buna görə də daha yaxşı olub, mənə inananların güvənini boşa çıxarmaq istəmirəm.

- 36 yaş voleybol üçün çox deyil?
- Həmişə yaşa adama mane olan bir nüans kimi baxırlar. Ancaq yaş bir rəqəmdi və bu komandaya təcrübə baxımından nə qədər kömək olacağıma işarədi. Özünüzə necə qulluq edəcəyinizi bilirsizsə, onda fiziki durumunuzdan ən yaxşı şəkildə istifadə etməyi də biləcəksiz. Məndə də belədi. Ona görə də yaşa fikir vermirəm.

- "Gəncə" yeni yaradılıb, hədəfləriniz nədi?
- Məqsədim komandanın hədəflərinə uyğun çalışmaq, komandaya kömək olmaqdı. Fərdi hədəflər də kollektivin uğur qazanmasına kömək ola bilər.

- Çempionatdakı rəqibləriniz haqda məlumatlısan?
- Rəqiblərimizlə tanışlıq olmayıb. Özümüzü və rəqibləri daha yaxşı tanımaq üçün bəzi yoldaşlıq görüşləri keçirəcəyik.

- Azərbaycan haqda daha əvvəl eşitmişdin?
- Xeyr, ölkəniz haqda daha əvvəl məlumatım olmayıb. Həmçinin də normalda çempionatda 12 komanda olmalıdı idi. Burda isə fərqlidi.

- Fransa, Argentina, Yunanıstan, Cənubi Kipr və Peru kimi ölkələrdə çıxış etmisən. Azərbaycan voleybolunu bu ölkələrlə necə müqayisə edərdin?
- Düzünü desəm, burda yeniyəm və çempionat başlamadığına görə nəsə demək çətindi. Lakin mən çıxış elədiyim çempionatların səviyyəsi də yaxşı idi.

- Azərbaycana gələn bir çox legioner məşqçilər, oyunçular regionlarda yox, paytaxt Bakıda qalmaq istəyir. Bununla bağlı planın nədi?
- Əlbəttə, paytaxtla rayonlar arasında fərqlər var. Lakin “Gəncə” rəhbərliyi bizi çox yaxşı qəbul etdi. İndi əsas məqsədimiz komandanın bu mövsüm ən yaxşı yerlərdə olmasıdı. Gəncə əhalisi bizi çox sevir. Elə performans göstərmək istəyirik ki, azarkeşlərimiz çempionatdan zövq alsın. Səbirsizliklə liqanın başlamasını gözləyirik. Yeni olsam da, Gəncəni sevməyə başlamışam. Burda tarixi, maraqlı yerlər var.

CAVİD ƏLİYEV