Yeni mövsümdən voleybol üzrə ölkə çempionatında çıxış edəcək komandalardan biri də "Gəncə"di.

Bu klub ilk dəfə güclülər arasında mübarizə aparacaq. "Sarı-göylər" transfer dövründə də fəallıq nümayiş etdirir. Yenilərdən biri milli komandamızın üzvü Leyla Parşkovadı. 25 yaşlı hücumçu ilə əlaqə saxlayıb, bəzi suallara cavab istədik.

- Yeni mövsümdən "Gəncə"də çıxış edəcəksən. Bu komandaya keçidin necə alındı?
- Klub prezidenti Elvar Osmanov məni bu komandaya gətirdi. Ona təşəkkür edirəm ki, mənə inandı.

- "Gəncə" yeni yaradılmış komandadı. Bu mövsümdən də elitada çıxış edəcəksiz. Komandanın qarşısına qoyulan hədəf nədi?
- İlk dəfə bölgə klubu ölkə çempionatında çıxış edəcək. Rəhbərlik qarşımıza medallar uğurunda mübarizə aparmağı və avrokuboklara getməyi hədəf qoyub. İnanırıq ki, bu məqsədlərə çatacağıq.

- Yeni yaranan komanda ölkə çempionatında medallar uğurunda mübarizə apara biləcəkmi?
- Güclü baş məşqçimiz var. Hədəflərimiz də böyükdü. İnşallah, mübariz komanda olub, yaxşı nəticələr qazanacağıq.

- Komandanı çempionata tam hazır görürsənmi?
- Hazırda heyət formalaşdırılır. İnşallah, yeni mövsümə tam hazır olmaq istəyirik.

- Karyeran ərzində "Azəryol", "Azərreyl" və "Murov" kimi komandalarda çıxış etmisən. İndiyə kimi legioner həyatı yaşamaq şansın olubmu?
- Ölkə xaricindən təklif olmayıb. Mən özümü hələ Avorpada oynamağa hazır görmürəm. Azərbaycandan kənarda yaşamağa çətinlik çəkirəm. "Gəncə"yə keçdiyimə görə də xoşbəxtəm. Bu komandanı təmsil edəcəyim üçün qürur duyuram.

- Milli komandanın heyətində müxtəlif turnirlərdə çıxış etmisən. Lakin Avropa çempionatına yollanan heyətdə səni görmədik. Yığmaya çağrılmamağının səbəbi nədi?
- Əslində məni yığmaya dəvət etmişdilər. Lakin səhhətimlə bağlı yığmaya getməyim alınmadı. İstərdim ki, ölkəmi bu turnirdə təmsil edim. Təəssüf ki, baş tutmadı.

- Millidən builki Avropa çempionatında nə gözləyirsən?
- Komandaya yeni baş məşqçi təyin olunub. Əlbəttə, yeniliklər olacaq. Milli bu turnirə ciddi hazırlaşırdı. Qrupumuzda yer alan yığmalar da çətindi. Amma biz də zəif deyilik. İnanıram ki, uğurlu nəticə əldə edəcəyik.

- Ölkə voleybolunun indiki durumu səni qane edirmi?
- Yeni prezident Şahin Bağırovun federasiyaya təyinatından sonra voleybolda irəliləyiş görürük. Paytaxtda və regionlarda aparılan seleksiya işləri buna nümunədi. Bölgələrimizdə istedadlı idmançılar var. Onları üzə çıxarmalıyıq.

CAVİD ƏLİYEV