Həm Konfrans Liqasında uğursuz çıxış edən, həm də yeni mövsümə biabırçı başlayan “Qəbələ” ilk ev oyununda uğur qazanmaq istəyirdi.

Bölgə təmsilçisi son iki oyunda xal qazanmaq bir yana, heç rəqib qapısına yol da tapa bilməmişdi. Odu ki, "qırmızı-qaralar" qol hesabını açmaq və ən azı məğlub olmamaq üçün çarpışacaqdı. "Kimyaçılar"ın isə ilk turda səfərdə "Səbail"i darmadağın edəndən sonra iştahı artmışdı.

"Football-plus.az" xəbər verir ki, oyuna qonaqlar fəal başladı. Və artıq 3-cü dəqiqədə onlar hesabı açdı. Rövlanın cərimə zərbəsindən qapı önünə asmasına Suliman ayaq qoymaqla topu tora göndərdi. Hesab açılandan sonra meydan sahibləri irəli atıldı. Allaş Auşeriyanı zərbə mövqeyinə çıxarsa da, qapıçı yerindəydi. Oyunun gedişində "qırmızı-qaralar"ın xətlərarası əlaqələrində çatlar görünürdü. Meydan sahibləri iki-üç ötürmədən sonra topu itirirdi. Qonaqlar isə meydanın hər yerində pressinq tətbiq edirdi. 30-cu dəqiqədə Allaşdan ötürmə alan Xalayla çətinlik bahasına qapını nişan alsa da, Cənnətov qola imkan vermədi. 31-ci dəqiqədə “vurmayana vurarlar" prinsipi yenə doğruldu. Səbuhi yaxşı “açılan” Kamranı gördü, "10 nömrə" dəqiq zərbəylə Atanqananı məyus etdi. "Qəbələ" yenidən irəli atıldı. Allaşın zərbəsinə Manteka blok qoydu. Ayzayanın həmləsi zamanı isə qapıçı topu qucaqladı. "Sumqayıt" fasiləyə üstün yollandı. Fasilədən sonra meydan sahibləri, gözlənildiyi kimi, oyuna fəal qoşuldu. Allaş ev tapşırığını yerinə yetib Urfanı zərbə mövqeyinə çıxarsa da, kapitan qeyri-dəqiq oldu. Elmar Baxşıyevin yetirmələri 53-cü dəqiqədə, nəhayət, qola sevindi. Rauf qapı önünə asma etdi, Kamran topu uğursuz uzaqlaşdırdı. Belədə Allaş Xalaylaya assistentlik etdi. Sonuncu hesab arasında fərqi azaltdı. Bu, "qırmızı-qaralar"ın mövsümdə ilk qolu oldu. Növbəti hücumda qəbələli futbolçular rəqibin qapısı önündəki qarışıqlıqdan yararlana bilmədilər. Belə ki, əvvəlcə Cənnətov Muradın sevinməsinə imkan vermədi. Ardınca müdafiəçilər iki dəfə zərbəyə blok qoydu. Allaşın kornerdən asmasına Murad yüksəlsə də, qapıçı topu qucaqladı. "9 nömrə"nin növbəti künc zərbəsinə Afriko yüksəlsə də, qeyri-dəqiq oldu. 81-ci dəqiqədə Ayzaya qapını yoxlasa da, Cənnətov seyviylə diqqət çəkdi. Mehracın həmləsi də uğursuz oldu. 90+4-cü dəqiqədə Xalayla başla topu Abramova ötürdü. Amma sonuncunun zərbəsinin qola çevrilməsinə Suliman imkan vermədi. Hakimin final fiti "Sumqayıt"ın qələbəsini, “Qəbələ”nin isə çempionatda ardıcıl 3-cü məğlubiyyətini rəsmləşdirdi.

Gözdən qaçmadı
* Sumqayıt Futbol Akademiyasının U-14, U-17, U-19 komandaları yoxlama oyunları çərçivəsində Qəbələdə təlim-məşq toplanışında olan Qətərin “Aspire” Akademiyasının müvafiq yaş qrupları ilə qarşılaşacaqdı. U-17 və U-19 yaş qrupları saat 17.00 və 17.30-da oyunları keçiriləcəkdi. U-14 isə avqustun 21-də yoxlama görüşünə çıxacaqdı.
* “Red-Black Army” fanklubu stadionda az sayda fanatla təmsil olunurdu ki, bu da gözlənilməz idi.
* "Qəbələ"nin prezidenti Fariz Yusifov failədə 10 ən yüksək bal toplayan yerli abituriyenti pul mükafatı və qiymətli hədiyyələr ilə təltif etdi.
* "Qəbələ"nin fəal azarkeşlərindən olan Elvin Qəbələdə təlim-məşq toplanışı keçən Qətərin "Aspire" Akademiyasının gənc oyunçularını "qırmızı-qaralar"a dəstək verməyə çağırdı və istəyinə nail oldu. Qətərli yeniyetmələr "Qəbələ, Qəbələ" şüarlarını səsləndirməyə başladı.

ABDULLA İSMAYILOĞLU