''Trabzonspor'' son dönəmlərdə nəticələri ilə fanatlarını sevindirə bilməsə də, rəhbərlik baş məşqçi Abdulla Avcı və 5 futbolçunun müqaviləsini yeniləmək qərarına gəlib.

Avcı ilə təxminən 1 aya yaxındı aparılan danışıqlar bəhrə verib və təcrübəli mütəxəssisin müddəti gələn yay başa çatmalı olan müqaviləsi 2025-cı ilə qədər yenilənib. Onun 8,5 milyon avroya bərabər olan illik məvacibinin də artırıldığı güman olunur. Amma konkret məbləğ bəlli deyil. Qeyd edək ki, 59 yaşlı mütəxəssis 2020-ci il noyabrın 10-dan komandanın başındadı. ''Trabzonspor'' onun dönəmində ötən mövsüm 38 illik həsrətə son qoyaraq çempion olub və ümumilikdə 4 titul qazanıb. Komanda Avcı ilə keçirdiyi 89 rəsmi oyundan 51 qələbə, 25 heç-heçə, 13 məğlubiyyətlə ayrılıb. Oyunçulardan isə Uğurcan Çakır, Abdülkadir Ömür, Muhammet Taha Tepe, Kağan Moradaoğlu və Canini ilə yeni müqavilə imzalanıb. Bu siyahıda xüsusilə Uğurcan Çakırla Abdülkadir Ömürün olması diqqəti çəkir. Türkiyə yığmasının da əsas qapıçısı sayılan Uğurcan uzun müddət Avropa klublarının hədəfində idi. Amma 26 yaşlı kapitanın 2024-ə qədər olan mövcud müqaviləsi 2027-yə qədər yenilənib. Onun illik məvacibi isə 2 dəfədən də çox artırılaraq 9 milyon lirədən 20 milyon lirəyə yüksəldilib. Abdülkadir Ömürün məsələsi də düyünə düşmüşdü. Gələn yay müqaviləsi bitməli olan istedadlı futbolçunun ayrılmaq istədiyi iddia edilirdi. Amma 23 yaşlı futbolçu ikiillik yeni müqaviləyə imza atıb. Bundan başqa, Canini və Muhammet Taha Tepe ilə 2025, Kağan Moradaoğlu ilə 2027-yə qədər yeni müqavilə imzalanıb.