Son çempion statusunda olmasına baxmayaraq, zəif və qeyri-sabit mövsüm keçirən “Trabzonspor”da məşqçi məsələsi, nəhayət, yoluna qoyuldu.

"Football-plus.az" xəbər verir ki, Abdulla Avcının martın 7-də istefa verməsinin ardından rəhbərlik məşqçi axtarışında idi. Komanda bu müddətdə 2 oyuna Avcının köməkçisi Orhan Akın, 2 oyuna da İhsan Dərəlioğlunun başçılığı altında çıxmışdı. Mətbuatda Sərgən Yalçın, Vinçentso Montella, Andrea Pirlo kimi isimlərin adları hallansa da, rəhbərlik fərqli seçim edib. “Trabzonspor”u bundan sonra xorvatiyalı mütəxəssis Nenad Byelitsa çalışdıracaq!

Hələ ötən həftənin bazar ertəsi axşam saatlarında Türkiyəyə gələn və rəhbərliklə son detalları razılaşdıran 51 yaşlı məşqçi ilə çərşənbə axşamı 2025-ci ilin yayına qədər nəzərdə tutulan rəsmi müqavilə imzalandı. Byelitsanın qazancı isə artıq indidən söz-söhbətə səbəb olub. Bu mövsümün qalan hissəsi üçün ona 100 min avro ödəniləcək. Sonrakı 2 mövsümün hər birində isə o, 1,6 milyon avro qazanacaq! Özü də bura bonuslar daxil deyil. Müqayisə üçün bildirək ki, komandaya ötən mövsüm tarixi çempionluq qazandıran Abdulla Avcı ilə bu mövsümün əvvəlində yeni müqavilə imzalanmışdı və onun illik qazancı yalnız 1,1 milyon avroya bərabər idi! Byelitsaya Avcıdan daha çox pul verilməsini fanatlar birmənalı qarşılamayıb. İstanbulda müqaviləyə imza atdıqdan sonra axşam saatlarında Trabzona ayaq basan Byelitsa hava limanında böyük izdihamla qarşılanıb. Ayaqüstü jurnalistlərə açıqlamalar verən xorvatiyalı bunları deyib:

1971-ci ildə Osiyekdə doğulan, o qədər də parlaq futbolçu karyerasına malik olmayan Byelitsa məşqçiliyə 2008-ci ildə Avstriyada başlayıb. O, futbolçu karyerasının son illərini bu ölkədə keçirdiyindən məşqçiliyə də burda başlamaq qərarına gəlib. Pillə-pillə yüksəlməyə üstünlük verən 51 yaşlı mütəxəssis “Austriya Kernten”, “Lustenau”, “Volfsberger”, Vyana “Austriya”sı, “Spetsiya” və “Lex”i çalışdırıb. Bu illərdə onun əsas uğuru “Volfsberger”i aşağı liqada çempion edərək elitaya yüksəltmək olub (2011/12). 2018-ci ildə Zaqreb “Dinamo”sunun başına keçməklə Byelitsa məşqçi karyerasında yeni mərhələyə qədəm qoydu və titulları sıralamağa başladı. “Dinamo” 2018-20-ci illərdə ölkə kuboku və superkubokunu qazanmaqla yanaşı, iki dəfə çempion oldu. Sonuncu dəfə 2020-22-ci illərdə doğma şəhərinin klubunda - “Osiyek”də çalışmışdı. Burda titul qazana bilməsə də, “Osiyek” onun dönəmində 87 rəsmi oyundan 49 qələbə, 23 heç-heçə, 15 məğlubiyyətlə ayrıldı ki, bu da hər oyuna orta hesabla 1,95 xal deməkdi.

“Dinamo”nun isə Byelitsanın dönəmində 99 rəsmi qarşılaşmada hər oyuna orta hesabla qazandığı xal 2,3-ə bərabər idi!