Türkiyənin 4 nəhəngindən biri “Trabzonspor” məşqçi dəyişikliyinə hazırlaşır.

"Football-plus.az" xəbər verir ki, komanda Nenad Byelitsa ilə heç cür istənilən nəticələri qazana bilmir. Qaradənizlilər son turda Adana səfərindən minimal hesablı məğlubiyyətlə qayıtdılar. Bu, komandanın 8-ci turda 4-cü məğlubiyyəti oldu. Byelitsa klub tarixində ilk 8 turda 4 məğlubiyyət yaşayan 5-ci məşqçidi. Əslində ev oyunlarında nəticələr qənaətbəxşdi. Qaradənizlilər bu məşqçi ilə indiyə qədər 7 ev matçından 6 qələbə, 1 məğlubiyyətlə ayrılıblar. Amma Byelitsa səfər oyunlarına heç cür çarə tapa bilmir. Rəqib meydanlarında isə göstəricilər belədi: 9 oyun, 2 qələbə, 7 məğlubiyyət. 52 yaşlı xorvatiyalı mütəxəssis bu vəzifədə heç 6-cı ayını da tamamlamayıb! O, aprelin 19-da, yəni ötən mövsümün sonlarına yaxın “Trabzonspor”la ikiillik müqavilə imzalamışdı. “Bordo-mavililər”in bu müddətdə bir dənə də heç-heçəsi yoxdu. Komanda Byelitsa ilə keçirdiyi 16 qarşılaşmadan 8 qələbə və 8 məğlubiyyət ilə ayrılıb. Türkiyə mətbuatının yazdığına inansaq, rəhbərlik hazırda bu məşqçi ilə təzminatla bağlı danışıq aparır. Byelitsanın illik qazancı 1,6 milyon avrodu və o, superliqanın ən çox qazanan məşqçisidi! Ötən mövsümün son 8 turu üçün ona 100 min avro ödənilmişdi. Bu mövsümdən etibarən isə 1,6 milyon avro qazanmalıydı. Problem yaradan məqam odu ki, Byelitsa təzminatın hamısını tələb edir. Rəhbərlik isə məbləği və klubun büdcəsinə dəyəcək ziyanı mümkün qədər aşağı salmağa çalışır.

Şayiələrə inansaq, başqan Ərtuğrul Doğan Byelitsanı Abdulla Avcı ilə əvəzləmək istəyir. 2021/22-də camiəyə tarixi çempionluq yaşadan Avcı qayıtmağın əleyhinə deyil və rəhbərlikdən xəbər gözləyir. Ötən mövsümün gedişində məhz Avcının istefasından sonra Byelitsa bu vəzifəyə gətirilmişdi. Diqqəti çəkən məqam odu ki, “Trabzonspor” bu məşqçi ilə həm ötən mövsümün son 8 turunda, həm də bu mövsümün ilk 8 turunda 12 xal toplayıb. Byelitsa komandanı 6-cı pillədə qəbul etmişdisə, hazırda “Trabzonspor” 7-ci pillədədi. Ayrılıq rəsmiləşsə, Byelitsa məşqçi karyerasının ən qısamüddətli təcrübəsini yaşamış olacaq. Buna qədər o, çalışdırdığı klublarda 7 aydan az işləməyib. Onu da bildrək ki, “Trabzonspor” bu yay Byelitsanın istəyi ilə transfer edilən 5 futbolçuya görə ümumilikdə 8,6 milyon avro ödəyibi. İstefanın qısa müddətdə rəsmən açıqlanacağı və komandanın yığma fasiləsindən sonra “Alanyaspor”la oyuna Avcının başçılığı altında çıxacağı gözlənilir.

Hələ ki bu mövsüm superliqada 7 istefa reallaşıb. İstefaların sayı yaxın günlərdə arta bilər. “Trabzonspor”dan başqa “Antalyaspor” və “Konyaspor”da da vəziyyət gərgindi. “Antalyaspor”da başqan Səbri Güləlin təzyiqlərə dözməyərək istefa verdiyi məlum olub. Bu üzdən 2 ilə yaxın bu vəzifəni icra edən baş məşqçi Nuri Şahin də yeni rəhbərliyin önünü açmaq üçün hər an istefa verə bilər. “Konyaspor” rəhbərliyi isə yanvarda baş məşqçi postuna gətirilən serbiyalı Aleksandar Stanoyeviçin nəticələrindən narazıdı. Həm “Antalyaspor”, həm də “Konyaspor” 8 tura 9 xal toplayıb.