Seçmə mərhələyə uğursuz başlayaraq səfərdə Serbiyaya uduzan Samir Əliyevin komandası doğma meydanda qələbəyə köklənmişdi.

"Football-plus.az" xəbər verir ki, tərəflər oyuna ehtiyatlı başladı. Bizimkilər topa maksimum topa nəzarət etməyə, qısa ötürmələrlə hücuma çıxmağa çalışırdı.

Oyunda ilk qol imkanını Əliyevin komandası yaratdı. Ancaq Raminin zərbəsi dirəkdən qayıtdı. 19-cu dəqiqədə Stüartın kornerdən asmasına yüksələn Makqakkin hesabı açdı. Qoldan sonrada rəqib müdafiədə oturmayıb meydanın mərkəzində pressinqini davam etdirdi. Makkirnan həmləsinə Hüseyn ayaq qoydu. 

36-cı dəqiqədə cərimə meydançasında Murada qarşı aşkar kobudluq edən Donnelliyə hakim birbaşa qırmızı göstərməklə qovdu, eləcə də penalti təyin etdi. Ancaq “nöqtə”yə yaxınlaşan Camalın zərbəsi qapıdan aralı keçdi. İlk hissəyə əlavə olunan dəqiqələrdə Makkirnan yüzfaizlik qol imkanını əldən verdi. Britaniyalılar fasiləyə üstün yollandı. 2-ci yarıya yığmamız fəal başladı. Ağadadaşın zərbəsi qapının üstündən keçdi. Camalla Samirin zərbələrini isə qapıçı dəf etdi. Muradın baş zərbəsi də hədəfə düşmədi. Hüseynin cəhdinə müdafiəçi blok qoydu. Futbolçularımızın bundan artıq nəyəsə gücü çatmadı. Onların oyun praktikasının azlığı özünü göstərdi.

Rəqib azlıqda qalmasına rəğmən, sıx müdafiə olunmaqla yığmamızın bütün cəhdlərinin qarşısını aldı. Referinin final fiti U-21-in ardıcıl 2-ci məğlubiyyətini rəsmləşdirdi. Görəsən, Şimali İrlandiyanı da məğlub edə bilməyən Samir Əliyev nəyə ümid edir? Onu da xatırladaq ki, U-21 qrupdakı 3-cü oyunu çərşənbə axşamı evdə Lüksemburqa qarşı keçirəcək. 

Oktyabrın 12-də bu qrupda daha iki oyun keçirilib: İngiltərə - Serbiya 9:1, Lüksemburq – Ukrayna 0:3.

1. İngiltərə 2 2 0 0 12-1 6
2. Ukrayna 2 2 0 0 4-0 6
3. Lüksemburq 3 1 0 2 1-6 3
4. Serbiya 2 1 0 1 3-9 3
5. Ş.İrlandiya 3 1 0 2 1-2 3
6. Azərbaycan 2 0 0 2 0-3 0

Gözdən qaçmadı 
* Oyun "Dalğa Arena"dan "Azərsun Arena"ya keçirildiyinə görə azarkeşlərin stadiona axışacağı gözlənilsə də, tribunalarda ancaq 100 nəfər gözə dəydi. 
* Oyunu izləyənlər arasında "Sabah"ın qolkiperi Nicat Mehbalıyev də var idi. 
* Rəqibin qapısına penalti təyin edilərkən zərbəni kapitan Fərid Yusifli vurmaq istədi. Ancaq Camal Cəfərov israrlı olduğundan Fərid geri çəkildi. "Sabah" futbolçusu isə topu yandan vurdu. 
* Oyun bitəndən sonra Fəridlə Qlinn arasında qarşıdurma yarandı. Hər iki komandanın futbolçuları meydana axışdı və çətinliklə də olsa, münaqişənin böyüməsinə imkan verilmədi. Referi hər iki oyunçuya sarı göstərdi. 
* Matç bitəndən sonra mətbuat konfransı olmadı. Yığmamızın baş məşqçisi Samir Əliyev brifinq keçirdi.

ABDULLA İSMAYILOĞLU