"Sabah" buna qədər ikisi Konfrans Liqasında olmaqla ardıcıl üç qələbə qazanmışdı.

Əlbəttə, Mikelslə bağlı məlum qalmaqal olmasaydı, “tələbələr” meydana daha yaxşı əhval-ruhiyyədə çıxa bilərdi. Zaman göstərdi ki, almaniyalının yoxluğuna üzülməyə dəyməzmiş.

Oyuna "Sabah" daha istəkli başladı. Artıq 3-cü dəqiqədə Till qapını yoxlasa da, top yan keçdi. Letiçin cərimə zərbəsi qapının üstündən keçdi. Tillin növbəti həmlərindən biri qeyri-dəqiq oldu, digərində Yovanoviç topu sinəsinə sıxdı. 27-ci dəqiqədə Apeh topu tora göndərsə də, hakim ofsayd qeydə aldı. İlk yarıya əlavə olunan dəqiqələrdə "Sabah"ın yüzfazizlik qol imkanlarını Yovanoviç əngəllədi. Belə ki, qolkiper əvvəlcə Alekseyin kornerdən asmasına yüksələn Anatolinin, ardındanə Kiristianın həmləsini dəf etdi. Komandalar fasiləyə qolsuz yollandı. 2-ci hissəyə də "bayquşlar" fəal başladı. Tilldən ötürmə alan Anatoli iki dəfə qapını nişan alsa da, Markoviç hər dəfə sipər oldu. Marqaritanın sevinməsinə isə qapıçı imkan vermədi. 68-ci dəqiqədə Letiçə qarşı kobudluğa görə referi penalti nöqtəsini göstərdi. Topa yaxınlaşan Alekseyin sevinməsinə Yovanoviç imkan vermədi. Elə onun səbəbkar olduğu künc zərbəsi zamanı müdafiəçilərin uzaqlaşdırdığı top Letiçin önünə düşdü. Serbiyalı müdafiəçi həmvətənlərinin qapısına necə möhtəşəm zərbə vurdusa, qapıçı heç yerindən tərpənmədi. Qoldan sonra da meydan sahibləri hücumlarını davam etdirdi. 74-cü dəqiqədə İsayev qapı önünə ötürməyəbənzər asma göndərdi. Bu zaman topa çatmağa çalışan, oyuna cəmi 4 dəqiqə əvvəl qoşulan Ələskərov müdafiəçi ilə qapıçını necə çaşdırdısa, heç kimə dəyməyən top sakitcə tora daxil oldu. Fərq artandan sonra “Sabah” əsasən meydanın mərkəzində top saxlamaq və rəqibin sürətli hücumlarının qarşısını almaq ilə məşğul oldu. Oyuna əlavə olunan dəqiqələrdə Namik qapını yoxlasa da, top qapıdan yan keçdi. Hakimin final fiti Murad Musayevin yetirmələrinin möhtəşəm qələbəsini rəsmləşdirdi. "Sabah" güclü rəqibi məğlub etməklə həm tarix yazdı, həm də Belqrad səfəri ərəfəsində ciddi üstünlük qazandı. Unutmayaq ki, “Sabah” avrokubokların debütantıdı. İndiyə qədər heç bir klubumuz debütdə ardıcıl üç qələbə qazanmağı bacarmayıb.

Gözdən qaçmadı
* Oyunun startından əvvəl tabloda "Sabah" azarkeşlərinin fəaliyyətlərinu əks etdirən videogörüntülər yer aldı
* Oyuna yarım saat qalmış "Soldati Di Sabah" fanklubu güclü dəstəyə başladı.
* Ötən mövsüm "Şamaxı"nın ev oyunlarında diktorluq edən Ceyhun Rzayevin artıq "Sabah"da eyni işə başladığını öyrəndik.
* Oyunun protokolu hakimin start fitinə 12-13 dəqiqə qalmış jurnalistlərə çatdırıldı.
* 44-cü dəqiqədə bütün stadion "Şəhidlər ölməz, vətən bölünməz" şüarını səsləndirdi.
* Oyun bitəndən sonra "Sabah"ın futbolçuları qələbəni azarkeşlərlə birgə qeyd etdi

Reaksiya
Aleksander Yovanoviç: “Hələ də növbəti mərhələyə çıxacağımıza inanıram. Cavab görüşünün ilk 20 dəqiqəsində qol vursaq, mübarizəyə dönəcəyik. Çox təəssüf ki, 2-ci qolu buraxdıq. Belə oyunlarda 0:2 uduzmaqdan 0:1 uduzmaq yaxşıdı. Səbəb axtarmaq istəmirəm, ancaq həqiqətən çox isti idi. Adamlar belə oyunda iki saat mübarizə aparmağın necə çətin olduğunu bilmirlər. Mən yalnız Kiprdə belə isti havada oynamışam”.