"Molde"ni də nəzərə alsaq, son üç oyunda qələbələri sıralayan "Qarabağ” doğma meydanda "Sumqayıt"ı da yenməklə zirvəyə yaxınlaşmaq, eyni zamanda İsveçə yaxşı əhval-ruhiyyədə yollanmaq niyyəti güdürdü.

"Kimyaçılar" isə ardıcıl uğursuzluqlardan sonra Suraxanıdan sərfəli nəticə ilə dönməyi düşünürdü. Hər iki komandada baş məşqçilər cəzalı olduğundan oyunu kənardan izləyəcəkdilər. Bu da, təbii ki, qarşılaşmaya təsirsiz ötüşməyəcəkdi.

Hakimin start fitindən sonra tərəflər oyuna ehtiyatlı başlasa da, dəqiqələr keçdikcə ağdamlılar üstünlüyü ələ alaraq rəqibi topsuz qoyadu və meydanın özünə aid hissəsinə sıxışdırdı. Ancaq ilk 15 dəqiqədə nə erkən qol, nə də real qol təhlükəsi oldu. Zubir sürətlə meydançasına şığıyıb Leandronu görsə də, onun zərbəsini boş qapıdan Bədəlov çıxardı. Zubirin təkrar zərbəsi isə hədəfə düşmədi. 22-ci dəqiqədə Dosso təhlükəni uzaqlaşdırarkən səhvə yol verdi, Juninyo topa sahib olaraq hesabı açdı. Qoldan sonra "köhlən atlar" coşdu. 27-ci dəqiqədə Leandronun qapı önünə asması zamanı müdafiəçilər özünü itirdi və Juninyo dublunu rəsmiləşdirdi.

Bir qədər sonra o, az qala het-trik də edəcəkdi. Cəfərquliyevin zərbəsi qapıdan yan keçdi. 37-ci dəqiqədə Rövlan Zubirə qarşı kobudluq etdi. Referi penalti nöqtəsini göstərsə də, sonra monitorda yaxınlaşıb qərarını bir daha dəqiqləşdirdi. Artıq “Qarabağ”da “ştatlı” penaltivurana çevrilən Toral hesabı 3:0 etdi. Maraqlıdı ki, ağdamlılar bu qoldan sonra da sakitləşmədi, əksinə, hücumları davam etdirdi. Leandro 43-cü dəqiqədə hesab arasında fərqi biabırçı həddə çatdırdı. Hissənin sonlarında Kamran komandasının ilk hücum cəhdini həyata keçirsə də, həmləsi uğursuz oldu.

Fasiləyə darmadağınla yollanan "Qarabağ" 2-ci yarıya da hücumla başladı. 50-ci dəqiqədə Benzyadan ötürmə alan Zubir komandasının 5-ci qolunu vurdu. "Kimyaçılar"dan Xaçayevin zərbəsi boşa çıxdı. Benzyanın sevinməsinə Rövlan imkan vermədi. Keytanın iki dəfə qol vurmasına qapıçı mane oldu. Qonaqlardan Kamranın zərbəsini Lunyov zərərsizləşdirdi.

Oyunun qalan dəqiqələri Qurban Qurbanovun yetirmələrinin top saxlamasıyla keçdi. Hakimin final fiti "Qarabağ"ın mövsümdəki 2-ci darmadağını rəsmləşdirdi. Ağdamlılar 2-ci tuda “Turan Tovuz”un qapısından üç cavabsız top keçirmişdi. “Sumqayıt”a isə nə olubsa, avqustun 19-da – Qəbələ səfərində olub. “Kimyaçılar” həmin oyundan bəri qələbənin nə olduğunu bilmir.

Gözdən qaçmadı

* Oyuna 50-yə yaxın "Sumqayıt" fanatı da təşrif buyurmuşdu.
* Matç 2 dəqiqə gec başladı.
* Qarşılaşma bitəndən sonra "Qarabağ" futbolçuları qələbəni azarkeşləriylə qeyd etdi.
* Hakimin final fitindən sonra Sumqayıtdan gələn azarkeşlər "kimyaçılar"ın futbolçularını səslədilər. Onlar bir neçə dəqiqə ərzində futbolçulara iradlarını bildirdikər. Azarkeşləri səbr və təmkin ilə dinləyən futbolçular onları alqışladı. İş ondadı ki, alqışlamaqdan başqa da seçimləri yox idi.

ABDULLA İSMAYILOĞLU