Dünən keçirilən “Tampa-Bey” – “Neşvill” oyunu ilə Milli Hokkey Liqasında müntəzəm çempionat start götürdü. Bəs Qərb və Şərq konfranslarında qələbə şansı daha yüksək olan komandalar hansılardı? Xatırladaq ki, son mövsümdə Stenli kubokunu məhz Qərbin çempionu, yəni “Veqas” qazanıb.

"Football-plus.az" xəbər verir ki, Şərq konfransında 1-ci yeri tutmağa əsas namizəd “Toronto”du. “Ağcaqayın yarpaqları” ötən mövsüm müntəzəm çempionatı 4-cü yerdə bitirdi, pley-offda isə artıq 2-ci mərhələdə mübarizəni dayandırdı. Komanda yayda “transfer bazarı”nda yaxşı çalışdı, ilk növbədə də lideri Oston Mettyusu saxlaya bildi, onunla müqavilənin müddətini daha 4 il artırdı. Bu üzdən kanadalıların konfrans çempionluğu şansı yetərincə yüksək dəyərləndirilir.

Ekspertlərin fikrincə, “Karolina” ilə “Nyu-Cersi”nin konfransda 1-ci yeri tutmaq şansı təxminən bərabərdi. Bu komandalar ötən mövsümü, uyğun olaraq, 2-3-cü yerlərdə bitirib. “Nyu-Cersi” ardıcıl qələbə sayına görə klub rekordunu da təkrarlayıb. “Devilz” 13 oyunluq seriya yaxalayıb ki, bu da MHL-də 9-cu nəticədi.

“Nyu-York”un adı da konfransın favoritləri sırasında göstərilir. “Göyköynəklilər” ötən mövsümü yalnız 5-ci yerdə bitirib. Əvəzində ötən müntəzəm çempionatın şəksiz-şübhəsiz ən yaxşı komandası “Boston”a yenə də inanmırlar. Elə Stenli kubokunun son finalçısı “Florida”ya da.
Yuxarıda adını çəkdiyimiz 6 komandadan sonra isə “Tampa-Bey”, “Pittsburq”, “Baffalo” və “Ottava”nın adı çəkilir.

Bəs Qərb konfransında mübarizənin axarı ilə bağlı proqnozlar necədi? Birdən-birə üç komandanın – “Kolorado”, “Edmonton” və “Veqas”ın qələbə şansı eyni dərəcədə yüksək qiymətləndirilir. “Veqas” ötən müntəzəm çempionatda ilk iki komandanı 2 xal fərqi ilə qabaqladı. “Edmonton”un heyətində son çempionatın iki bombardiri – Konor Makdevid (153 məhsuldar hərəkət) ilə Leon Drayzaytl (128) yer alıb. “Neftçilər”in əsas rəqiblərinin heyətində də top-ulduzlar var. “Kolorado”nun uğurlarına Natan Makkinnonla Mikko Rantanen, “Veqas”ın uğurlarına isə Cek Aykellə Conatan Marşesso töhfə verir.
Yuxarıda adını çəkdiyimiz üç komanda ilə yanaşı, “Dallas”ın konfrans çempionluğu şansı da yüksək qiymətləndirirlir. Ötən müntəzəm çempionatı 4-cü yerdə bitirən “ulduzlar” “Kolorado” ilə “Edmonton”dan yalnız 1 xal geri qalmışdı. Qərb konfransının 5-ci favoriti “Los-Anceles”di. Todd Maklellanın çalışdırdığı “krallar” ötən mövsüm elə 5-ci yeri tutmuşdu. Qərb konfransında qələbəyə qadir komandalar sırasında “Kalqari”, “Minnesota”, “Sietl” və “Vinnipeq”in də adı çəkilir.

Bütün bunlar öz yerində. Təbii ki, qarşıdakı mövsümün ən çox maraq doğuran suallarından biri də “Vaşiqnton”un rusiyalı ulduzu Aleksandr Oveçkinin neçə qol vuracağıdı. Axı indi onu əfsanəvi Ueyn Qretskidən cəmi 72 qol ayırır. Dünya hokkey ictimaiyyətinin ümumi fikri belədi ki, Oveçkin bu mövsüm fərqi minimuma endirməyə, gələn mövsüm isə tarixi uğura nail olmağa, yəni snayperlər cədvəlində zirvəni ələ keçirməyə çalışacaq. Maraq üçün MHL tarixinin snayperlər cədvəlinin ilk “5-liy”ini xatırladırıq:

oyunçu ölkə oyun qol
1. Ueyn Qretski Kanada 1487 894
2. Aleksandr Oveçkin Rusiya 1347 822
3. Qordi Hou Kanada 1767 801
4. Yaromir Yaqr Çexiya 1733 766
5. Brett Hall ABŞ 1269 741
11 oktyabr
Tampa-Bey – Neşvill 5:3 (1:0, 0:1, 4:2)
Pittsburq – Çikaqo 2:4 (1:0, 1:1, 0:3)
Veqas – Sietl 4:1 (2:0, 1:1, 1:0)