MHL-də son aprelin 6-da və 7-də keçirilən oyunlarla bağlı bəzi maraqlı məqamlar var.

"Football-plus.az" xəbər verir ki, dünən “Florida”nın “Ottava”nı məğlub etdiyi oyun hədsiz kobud mübarizə şəraitində keçdi. Maraqlıdı ki, komandalar birlikdə 166 cərimə dəqiqəsi qazandı. Bunun 78 dəqiqəsi “Florida”nın, 88 dəqiqəsi isə “Ottava”nın payına düşdü.

Aprelin 7-də “Arizona”ya qalib gələn “Sietl” tarixində ilk dəfə pley-offa vəsiqə qazandı. Xatırladaq ki, bu komanda MHL-də ötən mövsüm debüt edib və Qərb konfransında sonuncudan əvvəlki yeri tutub.

Müntəzəm çempionata çərşənbə axşamı yekun vurulacaq. Son 4 oyun günü ərəfəsində pley-offa adlayan komandaların siyahısına baxmağa dəyər. Qərb konfransında bu hüququ “Kolorado”, “Dallas”, “Minnesota”, “Veqas”, “Edmonton”, “Los-Anceles” və “Sietl”, Şərq konfransında isə “Karolina”, “Nyu-Cersi”, “Reyncers”, “Boston”, “Toronto” və “Tampa-Bey” qazanıb. Qərbdə yeganə vakant vəsiqəyə “Vinnipeq”, “Kalqari”, “Neşvill” və “Sent-Luis” iddilıdı. Şərqdə iki vəsiqə sahibini gözləyir. Burda da pley-offa iddiasını qoruyan 4 komanda var: “Florida”, “Aylenders”, “Pittsburq” və “Baffalo”.