Son iki oyunda xarakter nümayiş etdirən "qırmızı-qaralar" məğlub olmamışdı.

Odu ki, meydan sahibləri "Qarabağ"la oyunda da uğurlu seriyanı davam etdirmək istəyirdi. "Köhlən atlar" isə son turda "Sabah"ı rahat məğlub etməklə yanaşı, AL "Molde" üzərində də qələbə qazanmışdı. Hakimin start fitindən sonra qonaqlar oyuna fəal başladı. Artıq 2-ci dəqiqədə hesab açıldı. Patrik – Leandro - Keytan kombinasiyasını sonuncu dəqiq zərbəylə bitirdi. Qoldan sonra da "köhlən atlar" arxaya çəkilməyərək yaradıcı oyuna üstünlük verdi. Patrikin zərbəsində azacıq dəqiqlik çatmadı. 11-ci dəqiqədə Mateusun qapı önünə asmasına Nəriman yüksələrək komandasının 2-ci qoluna imza atdı. Erkən qollardan sonra meydan sahibləri ayılaraq irəli atıldı. Rauf iki dəfə Lunyovla duelə çıxsa da, hər dəfə rusiyalı qapıçı əla seyvlərlə qola imkan vermədi. 37-ci dəqiqədə Auaşeriya ilə Medina arasında münaqişə yarandı. Tezliklə qalmaqal daha da böyüdü və hər iki komandanın ehtiyat oyunçular skamyasındakı üzləri meydana daxil oldu. Sonra referi Medina ilə "Qəbələ"nin köməkçi məşqçisi Rasim Ramaldanova qırmızı, Qurban Qurbanova isə sarı vərəqə göstərdi. Hissənin sonlarına yaxın Haninin zərbəsinə Romao blok qoydu, Ayzayanın zərbəsi isə qeyri-dəqiq alındı.

Təbii ki, say üstünlüyü qazanan "qırmızı-qaralar" 2-ci hissəyə daha fəal başladı. Haninin zərbəsini qapıçı tutdu. Auaşeriyanın uzaqdan zərbəsi isə toru yandan sirkələdi. Allaşın təxminən penalti nöqtəsindən qüvvətli zərbəsinə da Lunyov növbəti seyvlə cavab verdi. 76-cı dəqiqədə Tetteh - Oçiqava kombinasiyasının ardından gürcü futbolçunun qapı önünə ötürməsinə Afriko ayaq qoymaqla hesab arasındakı fərqi azaltdı. Sona yaxın ehtiraslar bir qədər də gərginləşdi. 89-cu dəqiqədə Qurban Qurbanov qeyri-idmani hərəkətə görə “sarı” ilə cəzalandı ki, bu da avtomatik “qırmızı”ya çevrildi. “Qarabağ” baş məşqçisi ilə Medinanı itirsə də, qələbə hesabını qoruya bildi.

Gözdən qaçmadı
* Matçın startından öncə qəbələli yaşlı azarkeş üzünü Maksim Medvedevə tutaraq "bizə xal verəcəksiz", - deyə sual etdi. Kapitan isə ona gülüşlə cavab verdi.
* Qəbələyə "İmarət Tayfa" və "Qarabağ Ordu" fanklublarının 50-yə yaxın üzvü təşrif buyurmuşdu. İkincilər "Şəhidlər ən ali qürur mənbəyimizdi" şüarını qışqırdı. Meydan sahiblərinin "Red-Black Army" azarkeş qrupu da onlara şüarla cavab verdi.
*Gilad Abramov Zurab Oçiqava ilə əvəzlənsə də, stadionun diktoru meydana Hüseyn Mürsəlovun çıxdığını dedi.