Hələ oyun başlamamış azarkeşlər “Şəhidlər ölməz, vətən bölünməz” şüarını səsləndirməklə “Qarabağ”a motivasiya verməyə çalışdılar. Son günlər Qarabağda keçirilən antiterror əməliyyatlarını nəzərə alsaq, bu oyunun müəyyən emosional gərginliklə müşayiət olunması anlaşılandı.

"Football-plus.az" xəbər verir ki, stadion tam dolmasa da, “köhlən atlar” möhtəşəm dəstəyi hiss edirdi. Və komanda dərhal rəqibi təzyiq altına salmağa çalışdı.

İlk 5 dəqiqə ərzində ağdamlılar rəqibi öz qapısına sıxışdırmağı bacardı. İlk təhlükəli vəziyyəti də “Qarabağ” yaratdı. 10-cu dəqiqədə Benzyanın cərimə zərbəsindən ötürməsinə Medina toxunsa da, dəqiq ola bilmədi. Zaman keçdikcə norveçlilərin fəallığı artırmaq istəyi hiss olunurdu. Bəzi məqamlarda Maksim səhvə yol versə də, oyundaşları onu “sığortalaya” bilirdi. 16-cı dəqiqədə qonaqlar mərkəzdə topu itirdi. Bu ağdamlıların əks-hücum qurması üçün əla fürsət idi. Yankoviç bir qədər irəlilədikdən sonra Zubirə ötürmə verdi. Mərakeşlinin zərbəsindən sonra top toru yandan silkələdi.

Hissənin ortalarında “Qarabağ” təzyiqi daha da artırdı. “Molde” 17-ci dəqiqədən sonra mərkəzi keçə bilmirdi. “Köhlən atlar” ardıcıl hücumlarla norveçlilərin müdafiəçiləri narahat edirdi. Çempionumuz rəqibi yaxşıca təhlil etmişdi, onun cinah oyunçularının rahat hərəkətinə imkan vermirdi.

İlk yarımsaatda “Qarabağ” aşkar üstün idi və rəqibə göz açmağa imkan vermirdi. Təəssüf ki, ağdamlılar ələ düşən imkanları sağa-sola xərcləyirdi. Norveçlilər uğurla müdafiə olunur, bu da azarkeşləri narahat edirdi. “Qarabağ” mərkəzdən müdafiə xəttini yara bilmədiyindən hücumlar daha çox cinahlara yönəlirdi. Bu isə qapı önünə asmalarla müşayiət olunurdu. Bəzən də Zubir fərdi oynamaqla boşuna top itkisinə yol verirdi. 40-cı dəqiqədə Yankoviçin zərbəsi də qapının yanından keçdi.

İlk hissənin sonuna doğru norveçlilər tempi öldürməyə çalışır, “Qarabağ” isə bununla razılaşmırdı. 44-cü dəqiqədə Yankoviç, bir dəqiqə sonra Mateus qapıçının ayıq-sayıqlığını yoxladı. Lakin norveçli qolkiper etibarlı oynadı. Uzatma dəqiqəsində Yankoviçin zərbəsindən sonra qolkiper möhtəşəm reaksiya ilə topun qapıdan keçməsinə imkan vermədi. Beləliklə, 45 dəqiqə ərzində qapılara qol vurulmadı.

Fasilədən sonra komandalar meydana dəyişiklik etmədən çıxdı. Yenə “köhlən atlar” topa nəzarət etsə də, meydanda qəribə sakitlik hökm sürürdü. 51-ci dəqiqədə Juninyo uzaqdan zərbə ilə səssizliyi pozdu. Amma yenə qapıçı etibarlı oynadı. 3 dəqiqə sonra da braziliyalı diqqət mərkəzinə düşdü. Və bu dəfə də qapıçı yerində idi. Ardından Zubir yüzfaizlik qol imkanını qaçırdı. Belə davam edə bilməzdi, bizə qol lazım idi! Ağdamlıların hücumlarının ardı-arası kəsilmirdi. 56-cı dəqiqədə, nəhayət, hesab açıldı. Müdafiəçilərin uzaqlaşdırmaq istədiyi topu ələ keçirən Andrade zəif, amma dəqiq zərbə ilə topu qapıdan keçirdi.

Qoldan sonra qonaqlar bir qədər fəallaşsa da, bu cəmi 2-3 dəqiqə çəkdi. “Köhlən atlar” mərkəzdə topa nəzarəti davam etdiridi. 61-ci dəqiqədə Leandro hesabı artıra bilərdi. Lakin afrikalının zərbəsi qapının üstündən keçdi. 70-ci dəqiqədə Moe üç dəyişiklik etməklə komandanı gücləndirməyə çalışdı. Lakin bu gediş də nəticə vermədi. Meydanda yalnız bir komanda var idi – “Qarabağ”. Narahatlıq doğuran məqam ağdamlıların fürsətləri dəyərləndirə bilməməsi idi. 75-80-ci dəqiqələtdə “Molde” hücumlar qurmağa çalışsa da, müdafiəçilər və xüsusən də Lunyov etibarlı oynadı.

Son 10 dəqiqədə “Molde”nin təzyiqi artırmaq cəhdləri boşa çıxdı. Ağdamlılar uzatma dəqiqələrində iki dəfə qola yaxın oldu. Birində Juninyo əlverişli imkanı qaçırdı. Digər epizodda isə qolkiper Yankoviçin zərbəsini dəf edə bildi. Beləliklə, “Qarabağ” qrup mərhələsinə qələbə ilə başladı. Bu oyun həm də xüsusən “Qalatasaray”la oyunlardan sonra azərbaycanlı azarkeşlərin gözündə böyüyən “Molde” mifini dağıtdı. “Köhlən atlar” daha çox qol vurmalıydı. Ümid edirik ki, qrup mərhələsinin digər oyunlarında bu mənada vəziyyət düzələcək. Axı sonda top fərqi də işə yaraya bilər.