Oyunun həftəiçi keçirilməsinə baxmayaraq, maraq yetərincə yüksək idi.

Bir çoxları "Qarabağ"ın son 2 turda xal itirdiyini nəzərə alaraq flaqmanı favorit sayırdı. Qarşılaşmanın ilk 5 dəqiqəsi də "Neftçi"nin üstünlüyü şəraitində keçdi. Regekampfın komandası "Qarabağ"ın müdafiəçilərinə çətin anlar yaradırdı ki, səhnəyə Şeydayev çıxdı. Yankoviçin ideal ötürməsini qəbul edən forvard Brkiçi asanlıqla məyus etdi.

Qoldan sonra "Neftçi"nin toparlanmaq cəhdi 5 dəqiqə çəkdi. Sol cinahdan irəliləyən Şeydayev Andradeyə ötürmə etdi. Kabo verdeli yarımmüdafiəçi bir rəqibini aldatdıqdan sonra topu qapıdan keçirdi. Bu epizodda Brkiçin inamsızlığını da vurğulamaq lazımdı. Ağdamlılar hesabda irəlidə olsa da, sakitləşmək bilmirdi. "Köhlən atlar" ardıcıl hücumlarla "Neftçi"nin müdafiəsini narahat etdirdi. 31-ci dəqiqədə flaqman daha bir zərbə aldı. Stankoviç Benzyaya qarşı təcavüzkar hərəkətə görə qırmızı vərəqə alaraq meydanı tərk etdi. Bir çoxları bundan sonra "Neftçi"nin fərqin artmamasına çalışacağını düşünürdü. Lakin flaqman 40-cı dəqiqədə qol vurdu. Eminin yaxşı ara ötürməsini Saldanya dəqiq zərbə ilə tamamladı.

İkinci hissə başlayan kimi Regekampf Fəridi Caberlə əvəzlədi. Rumıniyalı məşqçi mərkəzdəki boşluğu doldurmaq istəyirdi. Lakin onun planı baş tutmadı. 55-ci dəqiqədə Yankoviçin cərimə zərbəsindən ötürdüyü topu Medina qapıdan keçirmək istəyərkən Saldanyaya dəyən "dəri kürə" tora daxil oldu. Qarşılaşma bundan sonra daha da qızışdı. Eminin məğlubiyyəti həzm edə bilmədiyi görünürdü. Kenni də fəal olmağa çalışırdı. Lakin "Qarabağ" güclü oyun sərgiləyərək müdafiə olunurdu. 64-cü dəqiqədə isə fərq yenidən azaldı. Medina Kenniyə qarşı cərimə meydançasında kobud oynadı. VAR-ın müdaxiləsindən sonra İnqilab Məmmədov penalti təyin etdi ki, Emin zərbəni dəqiq yerinə yetirdi. Amma "Neftçi"nin gücü bundan artığına çatmadı. Əvəzində "Qarabağ" daha da fəallaşdı. Zubir 80-ci dəqiqədə "ağ-qaralar"ın müdafiəsini pərən-pərən salaraq yekun hesabı müəyyənləşdirdi. Beləliklə, "Qarabağ" flaqmanı məğlub edərək çempionluq yolunda önəmli addım atdı. "Neftçi" isə 2022/23 mövsümünü bürünc medalla başa vuracaq.

Gözdən qaçmadı
* Futbolçular meydana "Autizmin fərqindəyik, onların yanındayıq" pankartı ilə çıxdı.
* Komandaların tərfdarları 90 dəqiqə ərzində mükəmməl dəstəklə oyuna rəng qatdı.
* Kilan Lebon əvəzlənərkən əsəbləşərək əlindəki suyu yerə çırpdı.
* Penalti təyin olunarkən Qurban Qurbanov 4-cü hakim Rəşad Əhmədova etiraz etdi. Hətta bu söhbət Emin qolu vurandan sonra da davam etdi.

İLKİN SULTANLI