“Qarabağ”la “Molde”si arasında keçiriləcək oyunun təyinatları bəllidi.

Qarşılaşmanı Şotlandiyadan olan hakimlər briqadası idarə edəcək. FİFA referisi Con Bitona Daniel Makferleyn və Duqlas Potter laysman qismində yardımçı olacaq. Dördüncü hakim funksiyasını isə Mettyu Makdermid yerinə yetirəcək. Qəzetimizin ənənəvi hakim təqdimatına keçid alaq.

Con Biton… 41 yaşlı ədalət təmsilçisi karyerasına 2001-ci ildə başlayıb. Şotlandiya çempionatında 11 il ədaləti təmsil edən referi, nəhayət, 2012-ci ildə FİFA hakimləri siyahısına salınıb. Ölkəsində qənaətbəxş statistikaya malikdi. Bəyənilmədiyini deyə bilmərik, amma ciddi səhvlər üzündən bir neçə dəfə media, azarkeş və baş məşqçilər tərəfindən tənqid atəşinə tutulub. Lakin bu, onun ümumi karyerasına zərər verəcək səviyyədə deyil. Ən azı bu məqam FİFA-nın güvəninə təsir etməyib. Biton yerli premyer-liqada 201 matçda meydana çıxıb ki, bu oyunlarda 757 sarı, 38 qırmızı vərəqə göstərib. Bundan başqa, dünya çempionatının seçmə mərhələ, Çempionlar, Avropa, Konfrans Liqası qarşılaşmalarını, həmçinin beynəlxalq yoldaşlıq oyunlarının və U-19, U-21 səviyyəsində oyunları idarə edib.

Maraqlıdı ki, Biton daha əvvəl üç dəfə məhz bu turnirdə “Qarabağ”ın səfər oyununda iş başında olub. Bunlardan birincisi 2016/17 mövsümündə ağdamlıların Yunanıstanda PAOK-la qarşılaşmasına təsadüf edib. Onun baş hakim olduğu matç “köhlən atlar”ın 1:0 hesablı qələbəsiylə sona çatıb. Həmin qarşılaşmada Maksim Medvedev sarı vərəqə alıb. Biton 2020/21 mövsümünün “Qarabağ” – “Makkabi” (Təl-Əviv, İsrail) görüşünü də idarə edib. 1-ci tur çərçivəsində baş tutan qarşılaşma rəqibin minimal hesablı qələbəsiylə yekunlaşıb. Şotlandiyalı bizimkilərin heyətində Kevin Medina, Vild-Donald Gerye, Filip Ozobiç və Patrik Andradeyə “sarı” göstərib. Ən maraqlı matç isə “Qarabağı”ın 2019/20 mövsümündə “Düdelanj” (Lüksemburq) sınağında baş tutub. Qurban Qurbanovun yetirmələri 4:1 hesabıyla qələbə qazanıb. Onu da qeyd edək ki, həmin oyunda erməni təxribatı olub. İlk yarıda qondarma qurumun “bayrağı” dronla stadiona gətirilib. 62-ci dəqiqədə isə ev sahibləri azlıqda qalıb. Göründüyü kimi, hakimin “Qarabağ”la bağlı statistikasə qənaətbəxşdi – 2 qələbə, 1 məğlubiyyət. Ümid edək ki, sbu gün qələbə sayı 3-ə çatacaq.

Həmçinin millilərimizin oyununda ədaləti qorumaq iki dəfə Bitona tapşırılıb. O, 2014-cü ildə AÇ-2015-in seçmə mərhələ oyununda U-19-un evdə macarıstanlı həmyaşıdlarıyla heç-heçə etdiyi (1:1) görüşdə çalışıb. 2019-cu ildə də U-21-in Avropa çempionatının seçmə mərhələsində evdə Slovakiyaya 1:5 uduzduğu matçda iş başında olub.

Ümumiyyətlə, Biton karyerası ərzində 497 oyun idarə edib. Bu görüşlərdə 1870 sarı, 101 qırmızı vərəqə göstərib.

KƏNAN BAHADIR