“Həkken”in əsas məqsədi çıxış etdiyi bütün turnirlərdə bacardığı qədər irəli getməkdi. Lakin “Qarabağ” Bakıda “Molde”ni məğlub etməklə göstərdi ki, belə rəqiblərə qalib gəlmək olar. Hamı Norveç təmsilçisinin ÇL-nin pley-off mərhələsindəki “Qalatasaray”la necə oynadığı deyirdi və “köhlən atlar”ın da bu qarşılaşmadakı qələbə şansının az olacağından söz açırdı. “Qarabağ” bu oyunda da qalib gələ bilər. Ancaq ev sahibi üstünlüyü isveçlilərdə olduğu üçün hücumda oynayacaqlar. Qurban Qurbanovun komandası hazırda daha formadadı. Mən avqustda Bakıya gələndə Çempionlar Liqasında “Linkoln” və “Rakuv” ilə görüşləri izləmişdim. Komanda həmin oyunlarda tam hazırlıqlı görünmürdü. Səbəb də mövsümə yeni başladıqları üçün oyunçularda uyğunlaşma prosesinin gec getməsi ilə bağlı idi. Cəbəllütariqdəki matçda isti hava şəraitinə görə komanda yaxşı oyun göstərə bilmədi. “Qarabağ” Polşa çempionuna qarşı da pis oynamadı, lakin bəzi səhvlər nəticəsində mərhələni keçə bilmədik. İndi qrupda heç nə bitməyib. Mütləq səfərdə “Həkken”lə “Molde”ni məğlub etməliyik. “Qarabağ” İsveçdə qalib gəlsə, demək olar ki, qrupdan çıxmağı böyük ölçüdə həll edəcək. Az səhv edən, qol epizodlarından yaxşı istifadə edən kollektiv qrup mərhələsini aşacaq. Skandinaviya futbolu fərqlidi. Onlar hava toplarında, cinahlardan hücumlarda üstündülər. Bizdə isə qısa ötürmələr daha çoxdu. Azərbaycan futbolunda standart vəziyyətlərin uğurlu olduğu yalnız bir şey var, o da Azərbaycansayağı künc zərbəsidi. Bax, bu bizim oyunçularda yaxşı alınır. Bunun üzərində çoxlu məşq edirik. Ümid edirəm ki, Höteborqda da əlimizə düçən belə fürsətlərdən yararlana biləcəyik. İnşallah, komandamız bu matçda qalib gələr. Dostlarım mənim üçün də bilet alıb. İşim olmasa, sabiq komandamı dəstəkləməyə gedəcəm. İsveçdəki azərbaycanlıların bu oyuna marağı böyükdü”.