7-ci tur maraqlı oyunlarla zəngin oldu.

“Football-plus.az” xəbər verir ki, “Monako” cəzalı Qolovinin yoxluğunda baş məşqçi postunda Qattuzonun debüt etduyu “Marsel”ə qalib gələrək zirvəyə döndü. “Nitsa” ilə qolsuz heç-heçə edən “Brest”in də “knyazlar” qədər xalı var. 3-cü pillədə isə “Reyms” qərarlaşıb. Bu komanda “Lion”u məğlub etməklə sonuncu pilləyə düşürdü. PSJ gözlənilmədən autsayderlərdən “Klermon”la oyunda xal itirdi.

PSJ buna qədər keçirdiyi 6 oyunda 1 xal qazanan “Klermon”un qonağı idi. Heç kim Luis Enrikenin komandasının qələbə qazanacağına şübhə etmirdi. İspaniyalı məşqçi mövsümdə ilk dəfə üç mərkəz müdafiəçisi ilə oynayırdı. Donnarumma ilk yarıda faktiki oyuna qoşulmadı. Böyük ərazi üstünlüyünə malik olan qonaqlar çoxlu imkanı boşa verdi.
2-ci hissə başlayan kimi PSJ-nin qolkiperi ardıcıl iki seyv etdi. Əvvəlcə Manyanın, ardından Nikolsonun zərbələrinin qarşısını aldı. Bu arada Mbappe də topu dirəyə vurdu. Oyunun axarından narazı qalan Enrike hissənin ortalarında Zair-Emeri ilə Ramuşu da meydana buraxdı. Meydanda hücumçuların sayı artsa da, hesabı dəyişmək mümkün olmadı.

“Monako” – “Marsel” oyununda azarkeşlər yerini rahatlamamış hesab açıldı – Ndiaye qonaqları irəli çıxardı. 7 dəqiqə sonra Akliuş bu qolun cavabını verdi. Ardından komandalar hərəyə bir dəfə fərqləndi. 2-ci hissənin əvvəlində Akliuş “knyazlar”ın 3-cü qolunu vurdu. Bundan sonra Qattuzonu debüt oyununda sevindirmək istəyən marsellilər böyük qüvvə ilə irəli atıldı. Belədə “Monako” əks-hücumlar üçün yaxşı imkan qazandı. Ancaq oyunda başqa qol olmadı. Beləliklə, ötən turdan sonra liderliyi əldən verən “knyazlar” yenidən zirvəyə qayıtdı.

“Nitsa” – “Brest” oyunu başladığı hesabla da bitdi. İlk yarıda az-çox təhlükəli vəziyyətlər qeydə alınsa da, fasilədən sonra meydanda açıq-aşkar sönük oyun getdi. Qolsuz heç-heçə bu oyunun məntiqi nəticəsidi.
“Lion”u qəbul edən “Reyms” inamlı qələbə qazandı. İlk yarının sonlarında zimbabveli Munetsi fərqləndi. 71-ci dəqiqədə isə mərakeşli mərkəz müdafiəçisi Əbdelhəmid “qırmızı-ağlar”ın üstünlüyünü möhkəmlətdi.

“Renn” evdə inadkar “Nant”la qarşılaşdı. Artıq 5-ci dəqiqədə “bülbüllər”in yarımmüdafiəçisi Mutussami cərimə meydançasında qaydanı pozduğuna görə hakim penalti təyin etdi. “Nöqtə”yə yaxınlaşan Burijo şansı əldən vermədi. “Nant” fasilə ərəfəsində Çirivelyanın sayəsində hesabı bərabərləşdirdi. İlk yarıda meydanda bərabər mübarizə gedirdisə, fasilədən sonra “qırmızı-qaralar” açıq-aşkar rəqibi üstələyirdi. Düzdü, təhlükəli vəziyyətlərin sayı o qədər də çox deyildi. Hər halda, “Renn”in təzyiqi sonda bəhrə verdi. 71-ci dəqiqədə meydana çıxan Due az sonra qələbə topunu vurdu. Məhəmməd ard-arda iki sarı vərəqə aldığına görə “Nant” 77-ci dəqiqədə azlıqda qaldı. Final fiti ərəfəsində isə “Renn” penalti qazandı. Bu dəfə “nöqtə”yə artıq meydanda olmayan Burijo yox, Kalimuendo yaxınlaşdı və qapıçı ilə dueldən qalib ayrıldı.

Turun qalan oyunlarına gəlincə, “Havr” evdə “Lill”ə uduzdu. “Lans” “Strasbur”a minimal hesabla qalib gəldi, “Tuluza” evdə “Mets”i darmadağın etdi – 3:0. “Monpelye” də bu hesabla, ancaq səfərdə “Loryan”a qalib gəldi.

7-ci tur
Klermon – PSJ 0:0
(10757)
PSJ: Donnarumma, Pereyra, Şkrinyar, Markinyos, Hakimi, Vitinya (Zair-Emeri, 64), Ruis, Barkola (Ramuş, 64), Mbappe, Kolo Muani, Dembele.
Monako – Marsel 3:2
Akliuş, 8; 52. Baloqun, 23 – Ndiaye, 1. Jiqo, 18. (10200)
Monako: Ken, Maqassa, Maripan, Sinqo, Venderson, Zakariya (Kamara, 90+3), Fofana, Yakobs (Diatta, 75), Akliuş (Matazo, 75), Ben Yedder, Baloqun (Boadu, 83).
Marsel: Lopes, Jiqo, Mbemba, Kloss, Murilyo, Unai (Vitinya, 83), Veretu, Ronjye, Korrea (Sarr, 75), Obameyanq, Ndiaye (Arit, 48).
Nitsa – Brest 0:0
(32044)
Nitsa: Bulka, Bar, Dante, Todibo (Rosario, 68), Atal (Lotomba, 68), Sanson (Budaui, 68), Ndaişimay, Türam, Boqa, Moffi (Gessand, 83), Lyabord (Buanani, 74).
Strasbur – Lans 0:1
Vai, 16. (26001)
Reyms – Lion 2:0
Munetsi, 45. Əbdelhəmid, 71. (16477)
Havr – Lill 0:2
Jeqrova, 40. Salmye, 52-öz qapısına. (21919)
Tuluza – Mets 3:0
Şmidt, 31. Dallinqa, 43. Maqri, 82. (24770)
Loryan – Monpelye 0:3
Adams, 30; 89. Savanye, 71-p. (13492)
Renn – Nant 3:1
Burijo, 6-p. Due, 73. Kalimuendo, 90+5-p. – Çirivelya, 45. (27316)
1. Monako 7 4 2 1 18-10 14
2. Brest 7 4 2 1 8-6 14
3. Reyms 7 4 1 2 13-8 13
4. Nitsa 7 3 4 0 8-4 13
5. PSJ 7 3 3 1 14-6 12
6. Renn 7 2 5 0 13-7 11
7. Lill 7 3 2 2 10-9 11
8. Strasbur 7 3 1 3 7-9 10
9. Monpelye 7 2 3 2 12-9 9
10. Havr 7 2 3 2 10-9 9
11. Tuluza 7 2 3 2 9-8 9
12. Marsel 7 2 3 2 9-11 9
13. Nant 7 2 2 3 12-14 8
14. Mets 7 2 2 3 7-13 8
15. Lans 7 2 1 4 7-12 7
16. Loryan 7 1 3 3 10-15 6
17. Klermon 7 0 2 5 5-12 2
18. Lion 7 0 2 5 3-13 2
Bombardirlər: Mbappe (PSJ) – 7, Məhəmməd (Nant), Adams (Monpelye) – 5, Ben Yedder (Monako), Aliui (Havr) – 4.
Növbəti turun oyunları oktyabrın 6-8-i aralığında keçiriləcək: Strasbur – Nant, Mets – Nitsa, Reyms – Monako, Marsel – Havr, Brest – Tuluza, Lion – Loryan, Monpelye – Klermon, Lans – Lill, Renn – PSJ.


Turun rəqəmi

12 – ilk 7 turdan sonra bu qədər xal toplayan PSJ “Qatar Sports Investments”in əlinə keçəndən bəri ən pis startını reallaşdırıb. Parislilər sonuncu dəfə 2010/11 mövsümünə belə uğursuz başlamışdı. Onda Antuan Kombuarenin çalışdırdığı komandanın da ilk 7 turdan sonra 12 xalı var idi.

Turun ulduzu

Maqnes Akliuş (Monako) – gənc yarımmüafiəçi turun mərkəzi oyununun qəhrəmanı oldu. Dubl etməklə yanaşı, daim rəqib müdafiəsini gərginlikdə saxladı. “Knyazlar” zirvəyə qayıtdığına görə ilk növbədə Maqnesə minnətdar olmalıdı.