Sabah 18 illik fasilədən sonra Azərbaycan basketbol klublarının avrokubok həsrəti başa çatır.
Bu həsrətə son ölkə çempionu "Sabah" son qoyacaq. "Tələbələr" FİBA Avropa Kubokunun təsnifat mərhələsində Niderland təmsilçisi "Donar"la qarşılaşacaq. Bununla bağlı komandanın əsas siması, oyunçusu Fuad Niftəliyevlə söhbətləşdik.

- 18 illik fasilədən sonra “Sabah” ölkəmizi avrokuboklarda təmsil edəcək. Sonuncu dəfə sizin də heyətində olduğunuz "Qala" iştirak edib.
- Bəli, onda Çağırış kubokunda Ukrayna təmsilçisi "Yujnı" ilə qarşılaşdıq və keçə bilmədik.Ancaq növbəti il digər Ukrayna klubu "Budivelnik"i keçdik, Latviyanın "Valmiera" komandasına uduzduq.

- Avrokuboka nə dərəcədə hazırsız?
- Hesab edirəm ki, daha çox yoldaşlıq oyunu keçirsəydik, daha yaxşı olardı.

- Sabah ilk rəqibiniz "Donar"dı. Ümumiyyətlə, bütün rəqibləri təhlil etmisiz? Qrupda ən çətin rəqib hansıdı?
- Bütün rəqiblərimizi təhlil etmişik. Lakin ilk rəqibimiz "Donar"a olduğuna görə əsas diqqətimizi bu matça yönəltmişik. Gənc kollektivdi, sürətli oynayırlar. İnşallah, qalib gələrik. Məncə, ən çətin rəqiblər Rumıniya təmsilçisi "Rapid" və Şimali Makedoniya "Rabotniçki"sidi. Ancaq ən təhlükəli "Rapid"di.

- Bu turnirdəki hədəfləriniz nədi?
- Sözsüz, ilk hədəfimiz qrupun 3 oyununda da qalib gəlməkdi. Bunun üçün çalışacağıq. Əsas güclü rəqibimiz də "Rapid"di. Ən azı ikinci olmalıyıq.

- Son ölkə çempionusuz. Bəs bu mövsüm liqadakı hədəfləriniz nədi? Çünki komandalar çox dəyişib, heyətləri güclənib. Bu il daha maraqlı çempionat izləyəcəyik...
- Bu il də hədəfimiz çempionluqdu. Ümid edirəm ki, bu mövsüm də bizi maraqlı oyunlar gözləyir. Komandalar da güclənib.

- 43 yaşınız var. Daha neçə il basketbol oynamaq niyyətindəsiz?
- Fiziki durumum yaxşıdı. Əsas odu ki, Allah ciddi zədələrdən qorusun. Sözün düzü, daha neçə mövsüm oynayacağım barədə fikirləşməmişəm. Məncə, ən azı 2-3 il də oynaya bilərəm.

CAVİD ƏLİYEV