“Mənim ölkəmi təmsil edən "Rabotniçki"nin yaxşı büdcəsi var” – püşklə bağlı dedi
Xəbər verdiyimiz kimi, Almaniyada basketbol üzrə FİBA Avropa Kubokunun 2023/24 mövsümünün püşkü atılıb. Ölkəmizi bu turnirdə son çempion "Sabah" təmsil edir.
“Football-plus.az” xəbər verir ki, turnirin debütantı olan "tələbələr" A qrupunda "Donar" (Niderland), "Rabotniçki" (Şimali Makedoniya) və "Rapid" (Rumıniya) ilə qarşılaşacaq.
Püşkatma, komandanın hazırkı durumu ilə bağlı “Sabah”ın Şimali Makedoniyadan olan çalışdırıcısı Boban Mitevlə əlaqə saxladıq:
"Əvvəlcə onu deməliyəm ki, məni burda çox isti qarşıladılar. Buna görə "Sabah" ailəsinə təşəkkür edirəm! Komandanın inkişafı üçün əlimdən gələnin ən yaxşısını etməyə çalışacağam. Püşkə gəlincə, hər şey mümkündü. Biz Avropada debütant sayılırıq. Yeni komandayıq. Klub kimi beynəlxalq turnirlərdə iştirak təcrübəmiz yoxdu. Mərhələli şəkildə komandanı avrokubok oyunlarına hazırlamalıyıq. Komanda yenidən qurulur. Zəif və güclü tərəflərimizi müəyyənləşdirməliyik. Rəqiblərimiz yaxşı maddi dayaqlara malik klublardı. Mənim ölkəmi təmsil edən "Rabotniçki"nin yaxşı büdcəsi var. Buna baxmayaraq, bu oyunlardan qalib ayrılmaq üçün hər görüşdə maksimum gücümüzlə mübarizə aparacağıq".
Qeyd edək ki, qrup oyunları oktyabrın 2-5-i aralığında Şimali Makedoniyanın paytaxtı Skopyedə keçiriləcək. “Sabah” bu mərhələni adlayarsa, D qrupunda "Mornar" (Monteneqro), "Baxçaşəhər" (Türkiyə) və “Nimburk” (Çexiya) komandaları ilə qarşılaşacaq.
CAVİD ƏLİYEV
Digər xəbərlər
