Almaniyada FİBA Avropa Kubokunun 2023/24 mövsümünün təsnifat mərhələsinin də püşkü atılıb.

"Football-plus.az" xəbər verir ki, ölkəmizi turnirdə çempion “Sabah” təmsil edəcək. Turnirin debütantı olduğuna görə püşkatma ərəfəsində 4-cü səbətdə yer alan “tələbələr”in bəxtinə aşağıdakı komandalar düşüb:

“Donar” (Qroningen, Niderland), “Rabotniçki” (Skopye, Şimali Makedoniya), “Rapid” (Buxarest, Rumıniya).

A qrupunun oyunları oktyabrın 2-5-i aralığında Şimali Makedoniyanın paytaxtı Skopyedə keçiriləcək. “Sabah” qrupdan çıxarsa, növbəti mərhələdə D qrupunda “Mornar” (Monteneqro), “Baxçaşəhir” (Türkiyə) və “Nimburk” (Çexiya) komandaları ilə mübarizə aparacaq. Xatırladaq ki, Azərbaycanı avrokuboklarda sonuncu dəfə 2005/06 mövsümündə “Qala” təmsil edib.

Yeri gəlmişkən, basketbol üzrə ölkə çempionatında yeni mövsüm oktyabrda start götürəcək. 9 komandanın – “Sabah”, NTD, “Xırdalan”, “Sərhədçi”, “Neftçi”, “Olimpik” (hamısı Bakı), “Gəncə”, “Zirvə” (Cəlilabad) və debütant “Sumqayıt”ın çempionatdı iştirakı dəqiqləşib. Daha bir klubun adı bu həftə dəqiqləşəcək.