“Sabah”ın oyunları ölkəmizdə göstəriləcəkmi?
Ölkəmizi basketbol üzrə FİBA Avropa Kubokunda təmsil edəcək “Sabah”ın qrup oyunların günü və başlama saatı məlum olub.
A qrupunda yer alan “Sabah”ın oyunlarının təqvimini təqdim edirik. Xatırladaq ki, oyunlar Skopyedəki “Sports Center Boris Traykovski” arenasında keçiriləcək.
2 oktyabr. Saat 19.30. “Donar” (Qroningen, Niderland) – “Sabah”
3 oktybar. Saat 22.30. “Sabah” – “Rabotniçki” (Şimali Makedoniya)
5 oktybar. Saat 19.30. “Rapid” (Buxarest, Rumıniya) – “Sabah”
Bəs, görəsən, Avropa arenasındakı yeganə klubumuzun oyunlarını ölkənin hansısa telekanalı yayınlayacaqmı? Bu sualı klubun mətbuat xidmətinin rəhbəri Kənan Hakimova ünvanladıq:
“Biz oyunların yayın hüququ ilə bağlı danışıqlar aparırıq. Çalışırıq ki, hansısa bir telekanal “Sabah”ın oyunlarını versin. Bunun üçün əlimizdən gələni edəcəyik”.
“Sabah”la bağlı başqa xəbərlər də var. Komandanın təlim-məşq toplanışı üçün gedəcəyi ölkə bəlli olub. “Tələbələr” sentyabrın 6-sı Serbiyaya yollanacaq və 18-nə kimi orda qalacaq. Komanda paytaxt Belqradda bir neçə yoxlama görüşü də keçirəcək. Hazırda rəqiblərin adları dəqiqləşdirilir.
Komanda sentyabrın ilk günündə daha bir transfer reallaşdırıb: amerikalı Smit Donovanla birillik müqavilə bağlanıb. 207 sm boya malik hücumçu son mövsümü Avstriya bundesliqasında çıxış edən “Vels” klubunda keçirib. Donovan peşəkar karyerası ərzində Cənubi Kipr, İspaniya, Gürcüstan və Rumıniya liqalarında oynayıb. 2022/2023 mövsümündə komandasının heyətində 42 görüş keçirən 29 yaşlı basketbolçu hər oyunda orta hesabla 24 dəqiqə meydanda olub, 15 xal toplayıb, 6 ribaundla yadda qalıb.
Xatırladaq ki, “Sabah” daha öncə Korin Henri, Pavle Marçinkoviç, Mayk Holton, Kivon Devonport, Entoni Vilson, Desmond Kembric, Şirzad Şirzadov və Endər Poladxanlını transfer edib. Fuad Niftəliyev, Rüstəm Əliyev, Əlikamran Məmmədov və Kaelin Kreynlə müqavilənin müddəti isə daha 1 il uzadılıb.
Digər xəbərlər
