Misli premyer-liqasının 7-ci turu çox maraqlı keçdi. 5 oyunun hamısında gərginlik hiss olundu.

Sumqayıtda keçirilən ilk qarşılaşmada hesab açılmasa da, futbol adına maraqlı oyun izlədik. Bu oyunu “Turan Tovuz” üçün növbəti xal itkisi saymaq olar. “Boz qurd” liderlər qrupunda irəliləyə bilərdi. Lakin qərblilər əllərinə düşən yaxşı fürsəti dəyərləndirə bilmədi. “Sumqayıt”ın isə hücum xəttində böyük problemin olduğunu anladıq. Yəqin Samir Abasov bu məsələ üzərində düşünməli olacaq.

Günün ikinci matçında da bərabərlik qeydə alındı. Paytaxt derbisində “Zirə” “Neftçi” ilə heç-heçə etdi. Qəsəbədəki görüşdə gərgin anlar yaşandı. Əslində flaqman daha yaxşı futbol sərgilədi. Hesab bərabərləşəndən sonra hiss olunurdu ki, Rəşad Sadıqovun komandası rəqibin oynayaraq yorulmasını istəyir. “Qartallar” bundan istifadə edərək “ağ-qaralar”ı əks-hücumda yaxalamaq istəyirdi. Lakin Rəşad Sadıqovun bu planı baş tutmadı.
Turun ən maraqlı oyunlarından biri Masazırda keçirildi. “Sabah” evdə “Kəpəz”lə heç-heçə etdi. Təbii ki, Murad Musayev bu nəticəyə görə özünü günahlandırmalıdı. Çünki təcrübəsiz Rüstəm Samiqullini start heyətində meydana buraxan məhz özü idi. Gəncəliləri isə təbrik etmək lazımdı. Azər Məmmədovun komandası yalnız güclü rəqiblərə qarşı oynaya bilir - “sarı-göylər” “Neftçi”, “Qarabağ” və “Sabah”dan xal alıb. Yəqin növbəti turlarda zəiflərdən xal almağa da öyrənərlər.

Bazar gününün ikinci oyunu da maraqlı keçdi. Bayılda çempionatın sürpriz komandaları üz-üzə gəlirdi. “Araz-Naxçıvan”ın fürsətləri boşa verdiyi görüşdə “Səbail”dən Pedro Nuno penaltini dəqiq yerinə yetirərək “dənizçilər”ə növbəti 3 xalı qazandırdı. Ardıcıl 4 oyunda qalib gələn Şahin Diniyevin komandası bu mövsüm çox rəqibə başağrı olacaq.

Həftənin son matçı isə çox gərgin, dramatik mübarizə şəraitində keçdi. Təkcə Qurban Qurbanovun uzun fasilədən sonra qırmızı vərəqə ilə cəzalandığını söyləmək kifayətdi. Bununla da meydanda hadisələrin necə cərayan etdiyini təsəvvür edə bilərsiz. “Köhlən atlar” 50 dəqiqə azlıqda oynasa da, Qəbələdən qələbə ilə dönməyi bacardı. İndi onları liderdən yalnız bir qələbə ayırır.

Misli premyer-liqası
1-ci dövrə, 7-ci tur
23 sentyabr
Sumqayıt – Turan Tovuz 0:0
Zirə - Neftçi 1:1
24 sentyabr
Sabah – Kəpəz 2:2
Səbail – Araz-Naxçıvan 1:0
25 sentyabr
Qəbələ - Qarabağ 1:2

1. Zirə 7 5 1 1 7-3 16
2. Səbail 7 4 1 2 12-9 13
3. Qarabağ 7 4 1 2 11-6 13
4. Turan Tovuz 7 3 2 2 11-8 11
5. Araz-Naxçıvan 7 3 1 3 7-8 10
6. Neftçi 7 2 3 2 6-5 9
7. Sumqayıt 6 2 2 2 7-5 8
8. Sabah 6 1 2 3 8-9 5
9. Kəpəz 7 1 2 4 5-11 5
10. Qəbələ 7 1 1 5 5-15 4

Bombardirlər: Aleksandr Ramalinqom (Səbail) – 4, Orxan Əliyev (Araz-Naxçıvan), Martin Petkov, Belajdi Pusi (hər ikisi "Turan Tovuz"), Osama Xalayla (Qəbələ), Olavio Juninyo, Hamidu Keyta (hər ikisi "Qarabağ") – 3.

Növbəti turun oyunları
29 sentyabr, 20.00. Qarabağ – Sumqayıt
30 sentyabr, 16.00. Turan Tovuz – Neftçi
30 sentyabr, 18.00. Səbail – Sabah
1 oktyabr, 16.00. Kəpəz – Qəbələ
1 oktyabr, 18.30. Araz-Naxçıvan – Zirə

İLKİN SULTANLI