Ötən cümə start götürən ölkə çempionatının ilk turunda bir-birindən maraqlı 5 oyuna şahidlik etdik.

"Football-plus.az" xəbər verir ki, açılış matçı cümə günü keçirildi.

Premyer-liqanın debütantı "Araz-Naxçıvan" "Turan Tovuz"u qəbul etdi. Hələlik Bakıda məskunlaşan naxçıvanlılar çempionatın təzə nümayəndələri kimi davranmadılar. İlk hissədə "boz qurd"a layiqincə müqavimət göstərən "qırmızı-ağlar fasilədən sonra təcrübəsizliyin qurbanı oldu. Ayxan Abbasovun komandası rəqibi 3 cavabsız topla məğlub etdi. Qonaqların yeni transferi Martin Petkov debütdə dubl etməklə bombardirlər yarışına qoşuldu.

Turun növbəti görüşləri şənbə günü keçirildi. Azarkeşlər hər iki qarşılaşmada sürpriz yaşadı. "Səbail"in doğma meydanda "Sumqayıt"a uduzması sensasiya olmasa da, gözlənilməz idi. "Kimyaçılar"ın "dənizçilər"ə 4 qol vurması şok effekti yaratdı.

Günün ikinci matçında "Qarabağ" "Zirə"ni qonaq edirdi. Demək olar ki, ağdamlılar "qartallar"a qarşı ikinci heyətlə meydana çıxmışdılar. Bu da Bakı təmsilçisinin işinə yaradı. Rəşad Sadıqovun komandası Dmitrios Çantakiasın yeganə qolu sayəsində "köhlən atlar"ı məyus etdi. Bununla da "Zirə" tarixində ilk dəfə "Qarabağ"ı məğlub etməyi bacardı.

Bazar günü ilk oyun Gəncədə keçirildi. Tarixi derbidə "Kəpəz" "Neftçi"ni qəbul edirdi. Bir çoxları bakılıların "Qarabağ"ın xal itirməsindən yararlanacağını düşünürdü. Lakin bu qarşılaşmada da sensasiya yaşandı. Gəncəlilər Mate Kvirkviyanın penaltidən vurduğu qolla paytaxt klubunu məğlub etdi.

Turun son matçında da gözlənilməz nəticə qeydə alındı. "Bank Respublika Arena"da "Sabah" "Qəbələ"ni qəbul edirdi. Bu mövsüm Konfrans Liqasında iştirak edən komandaların dueli maraqla gözlənilirdi. Lakin Masazır təmsilçisi bu qarşılaşmanın vacibliyini öldürdü. "Bayquşlar" 5 qol vuraraq "qırmızı-qaralar"ı darmadağın etdi.

Mövsümün hədsiz məhsuldar başlamasını da qeyd etməyə dəyər. 1-ci turun 5 oyununda 15 qol vuruldu, yəni orta məhsuldarlıq 3-ə bərabər olub. Bu, son 6 mövsüm üçün ən məhsuldar startdı. Daha yüksək göstərici sonuncu dəfə 2017/18 mövsümündə qeydə alınıb. Onda orta məhsuldarlığın 3,25 olduğu ilk turun 4 matçında 13 qol vurulub. Həmin vaxt “Neftçi” – “Qarabağ” (1:3) oyununda 4, “İnter” – “Qəbələ” (1:2), “Sumqayıt” – “Kəpəz” və “Zirə” – “Səbail” (hər ikisi 2:1) oyunlarının hərəsində 3 qol vurulub.

Misli premyer-liqası
1-ci dövrə, 1-ci tur
4 avqust
Araz-Naxçıvan - Turan Tovuz 0:3
5 avqust
Səbail - Sumqayıt 1:4
Qarabağ - Zirə 0:1
6 avqust
Kəpəz - Neftçi 1:0
Sabah - Qəbələ 5:0

Növbəti turun proqramı

12 avqust, 18.30. Zirə - Kəpəz
12 avqust, 21.00. Araz-Naxçıvan - Qəbələ
13 avqust, 18.30. Qarabağ - Turan Tovuz
13 avqust, 21.00. Sumqayıt – Sabah
14 avqust, 20.00. Neftçi - Səbail.

İLKİN SULTANLI