Artıq mayın əvvəlindəyik, ancaq Zirədə hələ də qışın soyuğu hiss olunurdu. Azarkeşlər yerini isitməmişdi ki, tovuzlular zirəlilərin kefinə “soğan doğradı”.

Künc zərbəsindən ötürülən topu Şəhriyar qapıya göndərdi. Qoldan sonra toparlanmağa çalışan meydan sahibləri ardıcıl hücumlar qurmağa başladı. 11-ci dəqiqədə Keyta reydini qeyri-dəqiq zərbə ilə tamamladı. Bir qədər sonra isə hakim Eldara qarşı qayda pozuntusunu 11 metrlik cərimə zərbəsi kimi dəyərləndirdi. Keyta topun arxasına keçmək istəyirdi ki, VAR müdaxilə etdi. Tural Qurbanovun xəbərdarlığından sonra Rauf Cabbarov penaltini ləğv etdi. Lakin 8 dəqiqə sonra Eldar istəyinə çatdı. Ona qarşı yenə cərimə meydançasında qayda pozuldu. Rauf Cabbarov bu dəfə də fitini səsləndirdi. Lakin Tural Qurbanov referini yenə VAR-a baxmağa dəvət etdi. Hakim epizodu izlədikdən sonra da qərarını dəyişmədi. Bununla belə, Keytanın zərbəsini Mehman dəf etdi. 38-ci dəqiqədən isə Keyta əla keçid edərək Rəhimə ötürmə verdi. Yarımmüdafiəçi qapıçını məyus etsə də, yan xətt hakiminin bayrağı havaya qalxdı. Hakim VAR-a baxandan sonra qolu ləğv etdi. İlk hissənin son dəqiqələri daha gərgin keçsə də, başqa qol vurulmadı. Bununla belə, ilk 45 dəqiqənin ən “zəif bəndi” birmənalı şəkildə hakim idi. Hiss olunurdu ki, FİFA referisi oyuna nəzarəti itirib.

İkinci hissə də hakim səhvləri ilə başladı. 53-cü dəqiqədə Xəyalın cərimə zərbəsindən ötürməsini Miller başla qapıdan keçirdi. Cabbarov əvvəlcə qolu qeydə alsa da, sonradan qərarını dəyişdi. Çünki tovuzlular ikinci fitdən öncə cəriməni yerinə yetirmişdi. 57-ci dəqiqədə isə qonaqlar hesab arasındakı fərqi artırdı. Künc zərbəsindən sonra "Zirə"nin qapısı önündə yaranan qarışıqlıqdan Oduva yararlandı. Bir qədər sonra isə tovuzlular daha bir qol vurdu. Marandiçinin cərimə zərbəsindən ötürməsini yenə Miller başla qapıdan keçirdi.

"Turan Tovuz" sanki 8 oyunluq qələbə aclığının əvəzini bu oyunda çıxmaq istəyirdi. Hesab 0:3 olsa da, tovuzlular dayanmırdı. 75-ci dəqiqədə Xəyalın asmasından sonra Runi topu başla qapıya göndərdi. Lakin son anda Coşqun onun xətti keçməsinə imkan vermədi. Dəqiqələr ötdükcə Ayxan Abbasovun komandası qələbəyə daha da yaxınlaşırdı. Amma "Zirə" də asan təslim olmaq fikrində deyidi. Belə ki, 86-cı dəqiqədə ikinci hissədə meydana çıxan Broqno möhtəşəm zərbə ilə fərqi azaltdı. Oyuna əlavə olunan dəqiqələrdə bakılılar yenə fərqləndi. Broqno qapı önünə göndərilən asmanı başla tora qovuşdurdu. Rauf Cabbarov isə VAR-ın müdaxiləsindən sonra qolu ləğv etdi. Çünki asmanı edən Coşqun ofsaydda idi. Beləliklə, gərgin və maraqlı keçən qarşılaşmada "Turan Tovuz" 3:1 hesablı qələbə qazanaraq, demək olar ki, premyer-liqada yerini təmin etdi. "Zirə" isə avrokuboklara vəsiqə uğrunda mübarizədə ağır zərbə aldı. Son 4 turda “Qəbələ” aradakı 6 xallıq fərqi “əritmək” çətin olacaq.

Gözdən qaçmadı
* Referi hər dəfə VAR-a baxanda Rəşad Sadıqov 4-cü hakim Vüqar Həsənliyə "azı 4 dəqiqə getdi", - deyə xəbərdarlıq edirdi.
* Rəhim Sadıxovun qolu qeydə alınmayandan 3-4 dəqiqə sonra Rəşad Sadıqov Vüqar Həsənliyə səsləndi: "CBC Sport"da göstərir ki, qoldu".
* Vüqar Həsənli ilk hissəyə əlavə olunan vaxtı göstərərkən Rəşad Sadıqov üsyan etdi: "Elə təkcə VAR-a baxmağa 8 dəqiqə getdi".
* Ayxan Abasov da biabırçı hakimlikdən təngə gəlmişdi. İlk hissənin sonlarında o, Vüqar Həsənliyə yaxınlaşıb "bu Rauf oyunu idarə edə bilmir", - deyə etiraz etdi.
* Hesab 0:3 olarkən tovuzlu azarkeşlər "Ayxan, sən bizim ürəyimizsən" şüarını səsləndirdi.

İLKİN SULTANLI