“Azərsun Arena”dakı oyunun çox çətin keçəcəyi bəlli idi. “Qarabağ” mövsümdə ilk qələbəsini qazanmalı, “Turan Tovuz” uğurlu startını davam etdirməli idi. “Köhlən atlar” aşkar favorit olsa da, tovuzlular da asan rəqib olmadığını həm ötən “futbol ili”nin sonlarında, həm də 1-ci turda “Araz-Naxçıvan”ı darmadağın edərək göstərmişdi.

Qonaqlar oyuna daha üstün başladı desək, yanılmarıq. Ayxan Abbasovun komandası bir neçə hücum cəhdi həyata keçirsə də, faydasız oldu. İlk təhlükəli vəziyyəti isə ağdamlılar yaratdı. Lakin komanda yoldaşları Diakabinin ötürməsini dəyərləndirə bilmədi. Ardından qonaqlardan Fərid Nəbiyev “çərçivə”ni dəqiq nişan ala bilmədi. Onun 15-ci dəqiqədə yerinə yetirdiyi cərimə zərbəsi də topun dirəyin yanından keçməsi ilə tamamlandı. Bundan sonra “köhlən atlar” hegomonluğu ələ aldı. Beləliklə, “Turan Tovuz”un qapısı qarşısında həyəcanlı anlar sıralandı. Aydın Bayramovun sayıqlığı dəfələrlə qonaqları yüzfaizlik qoldan xilas etdi. Ayxan Abbasovun komandası xüsusilə 25-ci dəqiqədən sonra, demək olar ki, topsuz qaldı. Nəticədə topa nəzarət “Qarabağ”da idi. Düzdü, ilk hücum cəhdləri uğursuz alındı. Xüsusilə Toral bir neçə dəfə komandasının əməyini puç etdi. Qurban Qurbanovun yetirmələri dinamik oyunun bəhrəsini 30-cu dəqiqədə gördü. Medvedevin cərimə meydançasına göndərdiyi topu Juninyo baş zərbəsi ilə tora qovuşdurdu. Hesabın açılması “Turan Tovuz”u daha cəsarətli çıxışa sövq etdi. Qonaqların meydandakı varlığı yalnız bundan sonra hiss olundu. Onlar bir neçə dəfə hesabı bərabərləşdirmək məqsədilə irəli atıldı. Amma Quqaşeşvalinin etibarlı oyunu buna imkan vermədi. Fərid Ottonun, Marandiçi isə Alexandronun ötürməsini “çərçivə”dən keçirə bilmədi. Bəhs edilən epizodlar Tovuz təmsilçinin ilk hissə üçün sonuncu şansları oldu. Beləliklə, “Qarabağ” paltardəyişmə otağına üstün yollandı.

İkinci hissədə qonaqlar rəqibin daha ağır təzyiqi ilə üzləşdi. “Köhlən atlar” var gücü ilə hücum edir, fəallaşan tovuzluların müqavimətini qırmağa çalışırdı. Aydın 49-cu dəqiqədə Patrikin qüvvətli zərbəsini dəf etməyi bacardı. Lakin irəliləyən dəqiqələr onun üçün xoş olmadı. “Boz qurd”un yorğunluğu açıq-aşkar hiss olunmağa başlamışdı. Bu ərəfədə Qurban Qurbanov Andrade, Zubir, Elvin “üçlüy”ünü meydana buraxdı. Düşünülmüş gedişin nəticəsi Ayxan Abbasovun komandası üçün çətin anlar yaşatdı. Cəmi 4 dəqiqə sonra Andradenin ötürməsi Zubirin, 7 dəqiqə sonra isə Zubirin ötürməsi Diakabinin qolu ilə nəticələndi – 3:0. Bundan sonra “Turan Tovuz” üçün hər şey dalana dirəndi. Diakabi Nərimanın 70-ci dəqiqə ötürdüyü topu “çərçivə”dən keçirə bilsəydi, fərq daha da artacaqdı. Lakin Aydının qurtarışı buna imkan vermədi. Qonaqların heç olmasa, bir qol axtarışı da faydasız oldu. Onlar 92-ci dəqiqədə sonuncu təhlükəli vəziyyəti yaratsalar da, Quqaşeşvali yerində idi. Hakimin final fiti “Qarabağ”ın yeni mövsümdəki ilk, özü də böyükhesablı qələbəsini rəsmiləşdirdi.

Gözdən qaçmadı
* İlk yarıda hava çox isti idi. Bunun futbolçulara mənfi təsiri açıq-aydın görünürdü.
* “İmarət Tayfa” kölgə olmayan sektorda sona qədər komandasını dəstəklədi.
* “Turan Tovuz”un ən böyük azarkeş qrupu “The Humans” da 120 azarkeşlə tribunada idi. Bakıda yaşayan təxminən 400 tovuzlu tərəfdar da stadiona gəlmişdi. Onlar bayram ab-havası yaratmışdı. Əldə etdiyimiz məlumata görə, Tovuz təmsilçisinin azarkeşləri daşıyan digər nəqliyyat vasitəsində nasazlıq olduğundan onlar Bakıya gəlməyib.
* “The Humans”ın üzvləri matç bitəndən sonra “Turan Tovuz” futbolçularının su içdiyi qabları meydandan yığıb zibil qutularına atdılar.

KƏNAN BAHADIR